काठमाडौं (हाम्रो खेलकुद) – टोकियो प्यारालिम्पिकका तेक्वान्दोमा दुई फाइट जितेकी पलेशा गोबद्र्धनलाई गैर आवासिय नेपाली संघ (एनआरएनए) जापानको कान्तो क्षेत्रिय समितिले स्वागत र नगदसहित सम्मान गरेको छ ।

कान्तो क्षेत्रिय समितिले पलेशालाई २ लाख ५० हजार, उनका प्रशिक्षक कविराज नेगी लामालाई १ लाख ५० हजार, ओलम्पियन दीपक विष्टलाई ४० हजार र नेपालको पारा तेक्वान्दो समितिलाई ५० हजार रुपैयाँ प्रदान गरेको छ । समितिले पारा तेक्वान्दो टोलीको सम्मानमा शनिबार कार्यक्रम र रात्री भोजको आयोजना गरेको थियो ।

कार्यक्रममा एनआरएन जापानका नवनिर्वाचित अध्यक्ष, उपाध्यक्ष, आइसिसी सदस्य, एनसिसी जापानका पदाधिकारी, तेक्वान्दो र अन्य खेलका पूर्व खेलाडी, व्यवसायीहरुको सहभागिता रहेको ओलम्पियन विष्टले जानकारी दिए ।

पलेशाले शुक्रबार भएको के ४४ अन्तर्गत ५८ केजी मुनीको तौल समूहको रेपेचेजको फाइनल खेलेकी थिइन् । पहिलो खेलमा पराजित भएपछि रेपेचेजमा कास्य पदकका लागि मौका पाएकी पलेशाले त्यसपछि दुई फाइट जित्दै फाइनल सम्मको यात्रा तय गरेकी थिइन् । फाइनलमा अन्तिम समयमा उनी १२–९ ले पराजित भएको थियो ।

ओलम्पिकमा दुई फाइट जित्ने पलेशा पहिलो खेलाडी बनेकी छिन् । प्यारालिम्पिकमा तेक्वान्दो पहिलो पटक तेक्वान्दो समावेश गरिएको थियो । पलेशाले एसियन पारा तेक्वान्दो च्याम्पियनसिपमा भने यसअघि कास्य पदक जितेकी थिइन् । कान्तो क्षेत्रिय समितिले पलेशाले भविष्यमा अन्तर्राष्ट्रिय प्रतियोगिता पदक जितेको खण्डमा नगद पुरस्कारले सम्मान गर्ने घोषणा गरेको छ ।