धनगढी (हाम्रो खेलकुद) – किर्तिमानी तेक्वान्दो खेलाडी दीपक बिष्टले सुदूरपश्चिमका नौ वटा जिल्लाका खेलाडीहरुलाई करीव २५ लाख रुपैया बराबरको खेलकुद सामग्री प्रदान गरेका छन् । उनले चार सय थान तेक्वान्दो डे«स, ६४ सेट तेक्वान्दो म्याट, १० पिस चेष्ट प्याड, २० थान तेक्वान्दो प्याड, सय थान फुटवल र २० थान भलिबल सुदूरपश्चिमका नौ जिल्लाका खेलकुद विकास समितिका प्रमुख तथा खेलाडीहरुलाई मंगलबार वितरण गरे ।

सुदूरपश्चिमाञ्चलका स्थायी बासिन्दा दीपकले विश्व तेक्वान्दो महासंघ डभाईचर चे, चाईल्ड रिच अर्गनाईजर, सुदूरपश्चिम समाज अष्टे«लियाका अध्यक्ष केशव जोशी, स्पोटर्स युनिभर्स काठमाण्डौं, पर्यटनकर्मी अमर शाही, कृष्ण बहादुर महरा, सञ्जय चौधरी र क्याप्टेन बेद उप्रेतीको सहयोगमा खेलकुद सामग्री वितरण गरिएको बताए । सुदूरपश्चिमाञ्चलबाट तेक्वान्दो खेल सुरु गरेका दीपकले दक्षिण एसियाली खेलकुदमा लगातार चार स्वर्ण तथा एसियाली खेलकुदमा दुई वटा कास्य पदक जितेका थिए । छनोट चरण पार गरेर सन् २००८ मा ओलम्पिक खेलेका दीपक सबैभन्दा सफल खेलाडी हुन् ।
राष्ट्रिय खेलकुद परिषद् (राखेप) का सदस्य सचिव केशव विष्टले सरकारले सहयोग गर्न नसकेको अवस्थामा दीपक बिष्टले गरेको सहयोगले खेलकुद सामग्रीको अभाव खेल गतिबिधि र अभ्यास गर्न नपाएका खेलाडीहरुलाई निकै सजिलो हुने विश्वास व्यक्त गरे । क्षेत्रीय खेलकुद विकास समितिका अध्यक्ष दीपक साँउदको अध्यक्षतामा सम्पन्न कार्यक्रममा राखेपका सदस्य एकिन्द्र कुँवरले पनि दीपकको कामको चर्चा गरे ।