काठमाडौं (हाम्रो खेलकुद) – नेपाल ओलम्पिक कमिटि (एनओसी) को प्रेक्षालयमा प्रथम एसियाली खेलकुद खेलकुद १९५१ (नयाँ दिल्ली) नेपालका प्रथम अन्तर्राष्ट्रिय धावक तथा नेपाली सेनाका पहिलो पुस्ताका खेलाडी स्व. गजराज जोशीको प्रतिमा अनावरण गरिएको छ ।

नेपाल ओलम्पिक संग्रालयको आयोजनामा एनओसीका अध्यक्ष जीवनराम श्रेष्ठले मंगलबार स्वर्गीय जोशीको प्रतिमा अनावरण गरेका हुन । कार्यक्रममा एनओसीका उपाध्यक्षद्धय चतुरानन्द राज वैद्य, ज्योती राणा, महासचिव निलेन्द्रराज श्रेष्ठ, टोखा नगरपालिकाका प्रमुख प्रकाश अधिकारीसहितले गजराज जोशीका विभिन्न आयमहरुका बारेमा धारणा राखेका थिए ।

एनओसीका अध्यक्ष श्रेष्ठले स्व. जोशीलाई आफुले एक खेलाडीको रुपमा मात्र स्मरण गरेकोमा आज आएर उनका बारेमा विविध जानकारी हासिल गर्न पाएको बताए । उनले आउदो पिढीको लागि स्व. जोशीको योगदानबाट प्रेरणा मिल्ने बताए ।

ओलम्पिक संग्राहलयमा खेल क्षेत्रलाई विकास गर्न योगदान गर्ने खेल कर्मी र विभिन्न खेलाडीहरुको प्रतिमा स्थापना गर्ने लक्ष्य रहेता पनि स्व. गजराज जोशीको खेलकुद लगायत विभिन्न क्षेत्रमा गरिएको योगदानको कदर गर्दै उनको प्रतिमा स्थापना गरिएको नेपाल ओलम्पिक संग्राहलयका अध्यक्ष क्षितिज अरुण श्रेष्ठले बताए ।

उक्त अवसरमा गजराज जोशीका पुत्र, नेपाल फुटभली संघका अध्यक्ष एवम् भेट्रान एथलेटिक्स खेलाडी मनिष जोशीलाई मानार्थ सदस्यता समेत प्रदान गरिएको थियो ।