काठमाडौं (हाम्रो खेलकुद) – केन्याको नेरोवी शहरमा आयोजना भएको विश्व यु–२० जुनियर एथलेटिक्स च्याम्पियनसिपमा नेपालका अजित कुमार यादवले औसतको प्रदर्शन गरेका छन् ।

पुरुषको ३ हजार मिटर दौडमा प्रतिस्पर्धा गरेका अजितले निर्धारित दुरी ९ मिनेट १५.२७ सकेन्डमा पूरा गरे । १६ खेलाडी सहभागी प्रतिस्पर्धामा अजित १४औं स्थानमा रहे । अस्वस्थताका बावजुत उनी च्याम्पियनसिप खेल्न केन्या पुगेका थिए । उनले पछिल्लो समय दशरथ रंगशालामा प्रशिक्षण गर्न नपाएको गुनासोसमेत गरेका थिए । पर्याप्त तयारीविना उनले आफ्नो व्यक्तिगत समयमा सुधार गर्न असफल भएपनि यो उनको सिजनको उत्कृष्ट नतिजा हो । अजितसँगै प्रशिक्षककको रुपमा धनीराम चौधरी केन्या पुगेका थिए ।

तीन वर्षअघि हङकङमा भएको तेस्रो एसियाली युथ एथलेटिक्स च्याम्पियनसिपमा उनले ३ हजार मिटरमा स्वर्ण जितेका थिए । त्यससमय उनले निर्धारित दुरी ८ मिनेट ३०.३२ सेकेन्डमा पूरा गरेका थिए । जुन उनको जुनियरमा समेत कीर्तिमान थियो ।

जुनियरमा पनि उनले विद्यालयस्तरीय राष्ट्रपति रनिङ सिल्डमो ८ मिनेट ४४.९ सेकेन्डको जुनियर राष्ट्रिय कीर्तिमान बनाएका थिए । सिनियरमा भने यो कीर्तिमान ज्ञानबहादुर बोहराको नाममा छ । उनले १९९९ मा भारतको नयाँ दिल्लीमा भएको एथलेटिक्स च्याम्पियनसिपमा ८ मिनेट २३.५९ सेकेन्डको कीर्तिमान रचेका थिए ।

एसियन जुनियर एथलेटिक्स च्याम्पियनसिपमा स्वर्ण जितेको आधारमा उनले विश्व जुनियर एथलेटिक्स च्याम्पियनसिपमा खेल्ने अवसर पाएका हुन् । अजितले यसै अगस्टमा भारतको पञ्जाबमा भएको १९औं यु–२० फेडेरेसन कप (अल इन्डिया जुनियर एथलेटिक्स च्याम्पियनसिप) दौरान अस्वस्थ हुदा कमजोर प्रदर्शन गरेका थिए । पुरुष १५ सय मिटर दौड ४ मिनेट ३२ दशमलव ५५ सेकेन्डमा पूरा गरेका अजित १४ जनामध्ये १२औं स्थानमा रहेका थिए ।

यस स्पर्धामा इथियोपियाका टाडेसे वर्कुले ७ मिनेट ४२.०९ सकेन्डको समय निकाल्दै स्वर्ण जिते । ७ मिनेट ४४.५५ सकेन्डको समय सहित इथियोेपियाकै अली अब्दिलमानाले रजत र इरिट्रिया हबटम सामुएलले ७ मिनेट ५७.६९ सकेन्डको समयसहित कास्य पदक जिते ।