काठमाडौं (हाम्रो खेलकुद) – अन्तर्राष्ट्रिय खेल सामाग्री उत्पादक केल्मीले टोकियो २०२० पारालिम्पिक गेम्समा भाग लिने नेपालको पारालिम्पिक टोलीलाई सामाग्री हस्तान्तरण गरेको छ ।

नेपालका लागि केल्मीको आधिकारिक विक्रेता कामारु ट्रेडिङका प्रवन्ध निर्देशक उत्तम न्यौपानले पारालिम्पिकमा सहभागी हुने ६ सदस्यीय टोलीलाई मंगलबार सामाग्री हस्तान्तरण गरेका हुन् । पलेशा गोवर्द्धनसहित ६ सदस्यीय टोली शुक्रबार जापान प्रस्थान गर्नेछन् । सेफ दि मिसनमा सरोज श्रेष्ठ, टिम अफिसरमा विश्वास बस्नेत, डक्टरमा दीपक श्रेष्ठ र अफिसियलमा दीपक विष्ट रहेका छन् । प्रशिक्षकमा कविराज नेगी लामा रहेका छन् ।

जापानको टोकियोमा २४ अगष्ट २०२१ देखि ५ सेप्टेम्बर २०२१ मा हुने पारालिम्पिक गेम्समा पारा तेक्वान्दो खेलाडी पलेशा गोवर्द्धनले प्रतिस्पर्धा गर्नेछिन् । पलेशाले के ४४ अन्तर्गत ५८ केजी मुनी प्रतिस्पर्धा गर्नेछिन् । उनले पारालिम्पिकका लागि वाइल्ड कार्ड प्राप्त गरेकी थिइन् ।

परालिम्पिक टोलीलाई सामग्री हस्तान्तरण गर्दै केल्मीका प्रवन्ध निर्देशक उत्तम न्यौपानेले खेलकुदको कुम्भमेला ओलम्पिक र पारालिम्पिकमा अफिसियल किट बन्न पाएकोमा खुशी व्यक्त गर्दै टोलीलाई सफलताको कामना गरे । उनले यस कार्यक्रमलाई बृहत बनाउने योजना बनाएपनि कोभिडका कारण त्यो सम्भव नभएको बताए ।

सेफ दि मिसन सरोज श्रेष्ठले विषम परिस्थितिमा पारालिम्पक टोलीलाई सहयोग गरेकोमा केल्मी परिवारलाई धन्यवाद ज्ञापन गर्दै सहभागितालाई खेर जान नदिने बताए । केल्मी र नेपाल पारालिम्पिक कमिटीबीच गत २० साउनमा सम्झौता भएको थियो केल्मीले पारालिम्पिकलाई ४ वर्षका लागि प्रायोजन गरेको छ ।

पारालिम्पिकका सबै अन्तर्राष्ट्रिय सहभागितामा नेपाली सहभागीले केल्मीको खेल सामाग्री प्रयोग गर्नेछन् । अहिले जापानमा जारी ओलम्पिकका लागि पनि नेपाली टोलीलाई केल्मीले प्रायोजन गरेको थियो । देशभरमा केल्मीका १३ वटा आउटलेट छन् ।