काठमाडौं (हाम्रो खेलकुद) – अमेरिकामा बसोबास गरिरहेका करातेका पुर्व अन्तर्राष्ट्रिय र राष्ट्रिय खेलाडीसँगै प्रशिक्षक तथा च्याम्पियन मार्सल आर्ट्स युएसएले अस्वस्थ्य रहेका कराँतेका निर्णायक जस बहादुर पुनलाई आर्थिक सहयोग हस्तान्तरण गरेको छ ।

करातेका पुर्व अन्तर्राष्ट्रिय तथा राष्ट्रिय खेलाडी तथा च्याम्पियन मार्सल आर्ट्स युएसएले नेपालमा कराते भित्र्याउने करातेका संस्थापक थानेश्वर राईको उपस्थितिमा संकलित १ हजार ६ सय अमेरिकी डलर अर्थात (१ लाख ८८ हजार ८ सय ३४ रुपैयाँ) पुनको परिवारलाई मंगलबार हस्तान्तरण गरिएको हो । उक्त संकलित रकम पुनको श्रीमती रोजिना लामाको नाममा नेपाल पठाइसकेको ११औं सागका स्वर्णधारी सुनिल लामाले हाम्रो खेलकुदलाई जानकारी गराए ।

एसियन कराते महासंघ (एकेएफ) को जज तथा नेपाल कराते महासंघ नेपालको राष्ट्रिय निर्णायक पुन विगत ३५ दिनदेखि चितवनस्थित भरतपुर अस्पतालमा उपचाररत छन् । ५२ वर्षीय पुनलाई सुरुवातमा नाकबाट ब्लिडिङ भएपछि अस्पताल भर्ना गरिएको थियो । पछि फोक्सोमा पानी जमेको रिपोर्टमा देखिएपनि पछिल्लोपटक आन्द्रामा क्यान्सरको शंका गरिएको र स्वास्थ्यमा क्रमिक सुधार भइरहेको उनको परिवारले जनाएको छ ।

नेपाली करातेका संस्थापक थानेश्वर राई, नेपाल कराते महासंघको पुर्व महासचिव तथा वरिष्ठ प्रशिक्षक आनन्दु लामा, १३औं एसियन गेम बैंककका कास्य विजेता सम्मर बहादुर गोले, प्रशिक्षक जनक सिंह खड्का, ११औं सागका स्वर्ण विजेता तथा १३औं एपिएसकेइफका स्वर्ण विजेता सुनिल लामा, राष्ट्रिय खेलाडी विजय लामा र १७औं इन्चोन एसियाडका कास्य विजेता बिमला तामाङले सहयोग गरेका छन् ।

यस्तै सुदूरपश्चिका वरिष्ठ कराते प्रशिक्षक करण चन्द, डीवी राउत, प्रेम तामाङ, आठौं साग गेम्सका कास्य विजेता मकेन्द्र बहादुर सिंह, प्रशिक्षक ज्ञान सुनुवार, प्रशिक्षक कुवेर सिंह खड्का र थेरापिस्ट पदम विष्टले अस्वस्थ्य रहेका पुनको उपचारका लागि आर्थिक रकम सहयोग गरेका थिए ।