काठमाडौं (हाम्रो खेलकुद) – गल्कोट स्पोर्ट्स टोकियोले ‘ग्रुप अफ जापान हान्स कप –२०२१’ खुल्ला पुरुष भलिवल प्रतियोगिताको उपाधि जितेको छ ।

आइतबार हान्यु शि साईतामा केनमा रहेको हान्यु गेम सेन्टर जापानमा भएको फाइनलमा आयोजक मध्येको एक ग्रुप अफ जापानलाई ३–२ को प्रतिस्पर्धात्मक सेटमा हराउँदै गल्कोटले उपाधि जितेको हो ।

उपाधिसँगै गल्कोट स्पोर्ट्सले ३ लाख जापानी येनसँगै मेडल, ट्रफी र प्रमाणपत्र प्राप्त गरेको छ । दोस्रो भएको ग्रुप अफ जापानले २ लाख तथा तेस्रो भएको गल्कोट समाज टोकियोले १ लाख जापानी येनसहित ट्रफी, मेडल र प्रमाणपत्र प्राप्त गरेका छन् ।

ग्रुप अफ जापानका मदन साउद प्रतियोगिताको सर्वाेत्कृष्ट खेलाडी चुनिए । गल्कोट समाजका राजन मल्ल उत्कृष्ट स्पाइकर, एनवाइएससी जापानका प्रकाश चन्द्र जोशी उत्कृष्ट क्वीकर र ग्रुफ जापानकै उमेर लामिछाने उत्कृष्ट सेटर चुनिए । गल्कोट स्पोर्ट्सका महेन्द्र भण्डरी अनुशाषित खेलाडी चुनिए ।

विजयी खेलाडीलाई राम थापा (काजी), पुर्व अन्तर्राष्ट्रिय भलिबल खेलाडी श्री गुरुङ, ग्रुप अफ जापानका अध्यक्ष मदन साउद, हान्यु नेपाली समाज जापानका अध्यक्ष नारायण अमगाईं लगायतले पुरस्कृत गरे । यस्तै आयोजकले लामो समय जापान बसोबास गरि भलिबल खेल्ने भलिबल खेलाडीहरु लाई प्रशंसा पत्र हस्तान्तरण गरिएको थियो ।

हान्यु नेपाली समाज जापान र ग्रुप अफ जापानको संयुक्त आयोजनामा भएको एक दिने प्रतियोगितामा जापानमा रहेका नेपाली समुदायका १२ टोलीले सहभागिता जनाएका थिए । प्रतियोगिता नकआउटकै आधारमा भएको थियो ।

भलिबल प्रतियोगिता आयोजना गर्नुको उद्धेश्य जापानमा रहेका नेपालीहरुबीच आपसी सदभाव र भाईचाराको भावनालाई प्रगाढ बनाउनका लागि प्रतियोगिताको आयोजना गरिएको पुर्व राष्ट्रिय भलिबल खेलाडीसमेत रहेका ग्रुप अफ जापानका अध्यक्ष मदन साउदले जानकारी दिए ।