तनहुँ (हाम्रो खेलकुद) – ऋसिङ गाँउपालिकाका झापुटारका श्री बहादुर आले र विपिन थापाको जोडीले तनहुँ जिल्ला स्तरीय ‘रिजाल स्पोर्ट्स कप’ पुरुष डबल्स ब्याडमिन्टन प्रतियोगिताको उपाधि जितेको छ ।

तनहुँको सदरमुकाम दमौलीस्थित उत्तरशिला चलचित्र हलमा शनिबार भएको फाइनलमा श्री र विपिनको जोडीले दमौलीका विश्वास विक र राम गुरुङको जोडीलाई २१–१५ र २१–१८ ले पराजित गर्दै उपाधि जित्न सफल भएको हो ।

खैरेनीटारका सफल भुजेल र विवेक थापाको जोडीलाई उत्कृष्ट खेल प्रदर्शन गरेको भन्दै पुरस्कृत गरिएको थियो । रिजाल स्पोर्ट्स हाउसले आयोजान गरेको दुई दिने प्रतियोगितामा तनहुँ जिल्लाभरका ४१ जोडीले सहभागिता जनाएका थिए ।

विजयी खेलाडीलाई वरिष्ठ अम्पायर उदय अर्याल, बर्ड विद्युत प्राधिकरणका इन्जिनियर दुर्गा दत्त सुवेदी, ऋसिङ गाँउपालिकाका अध्यक्ष राजेन्द्र कृष्ण श्रेष्ठलगायतले पुरस्कृत गरे ।

समापनका अवसरमा नेपालबाट टोकियो पारालिम्पिक २०२० मा लाइन जजको भुमिका निर्वाह गर्न जान लागेका ब्याडमिन्टन वल्ड फेडेरेसन (बिडब्लुएफ) का सर्टिफाइड लाइन जज उदय अर्याललाई सम्मान तथा बिदाई गरिएको छ । उनलाई व्यास नगर ब्याडमिन्टन क्लबका सदस्य राजु गुरुङले सम्मान तथा बिदाई गर्दै उनी जस्तो वरिष्ठ अम्पायरलाई सम्मान तथा बिदाई गर्न पाउदा तनहुँ जिल्लावासीलाई गर्वको आभास भएको बताए ।