एजेन्सी – भदौं दोस्रो सातादेखि फिलिपिन्सको क्लार्क र सेविकमा आयोजना हुने भनिएको २१औं संस्करणको एसियन सिनियर महिला भलिबल च्याम्पियनसिप स्थगित भएको छ ।

फिलिपिन्समा पछिल्लो समय कोरोना संक्रमण दर बढ्दै गएपछि र फिलिपिन्स सरकारले लगाएको लकडाउनको कारण फिलिपिन्स भलिबल फेडेरेसनले च्याम्पियनसिप तत्कालका लागि स्थगित गरेको हो । च्याम्पियनसिप फिलिपिन्सको क्लार्क र सेविकमा अगष्ट २९ देखि सेप्टेम्बर ४ सम्म हुने तालिका थियो ।

एसियन भलिबल फेडेरेसन (एभीसी) ले फिलिपिन्स भलिबल फेडेरेसनलाई २४ देखि ३० अथवा ३१ अगस्टसम्म च्याम्पियनसिप आयोजना गर्न नयाँ मिति प्रस्ताव गरेको छ । तर यो मितिमा च्याम्पियनसिप हुनेमा शंका छ । त्यसपछिको अवस्थापछि निर्णय लिइने फिलिपिन्स भलिबल फेडेरेसनले जनाएको छ ।

च्याम्पियनसिपमा सुरुवातमा नेपालले पनि खेल्ने तय थियो । तर, नेपाल कोरोनाको रेड जोनमा रहेको भन्दै फिलिपिन्सले नेपाललाई बाहिर राख्दै च्याम्पियनसिपको समूह विभाजन र खेल तालिका सर्वाजनिक गरेको थियो । सुरुवातमा १७ राष्ट्र रहेपनि त्यसपछि ५ राष्ट्रले नाम फिर्ता लिदा १२ टोलीको सहभागिता रहने बताएको थियो । तर, अन्तिम समयमा कोरोनाका कारण ८ टोलीको मात्रै खेल्ने टुंगो लागेको थियो ।

च्याम्पियनसिपका लागि नेपालले प्रारम्भिक चरणमा ३० खेलाडीलाई राख्दै १ असारबाट बन्द प्रशिक्षण सुरु गरेको थियो । त्यसपछि दोस्रो चरणमा १८ खेलाडी छनोट भइसकेको थियो । झन्डै १ महिनाको प्रशिक्षणपछि नेपालले च्याम्पियनसिप नखेल्ने भएपछि नेपालको प्रशिक्षण पनि रोकिएको छ ।