एजेन्सी – विश्व कीर्तिमानी केन्याका इलुड किपचोगेले टोकियो ओलम्पिक २०२० अन्तरगतको पुरुष म्याराथनतर्फ स्वर्ण पदक जितेका छन् ।

ओलम्पिक म्याराथनमा दोस्रो स्वर्ण जित्ते क्रममा ३६ वर्षीय इलुडले निर्धारित दूरी २ घण्टा ८ मिनेट ३८ सेकेण्डमा पूरा गर्दै स्वर्ण जितेका हुन् । उनले आफ्नो निकटतम प्रतिद्धन्द्धीलाई १ मिनेट १७ सेकेन्डले पछि पारे । उनले सन् २०१६ को रियो ओलम्पिकमा स्वर्ण जितेका थिए । उनले रियो ओलम्पिकमा भन्दा ६ सेकेन्डको समय सुधार गरेका छन् ।

उनको नाममा २ घन्टा १ मिनेट ३९ सेकेन्डको कीर्तिमान छ । उनले सन् २०१८ मा बर्लिन म्याराथनमा यो विश्व कीर्तिमान कायम गरेका थिए । ओलम्पिकमा उनको यो चौथो पदक हो । उनले यसअघि २००४ को एथेन्स ओलम्पिकमा ५ हजार मिटरमा कास्य तथा २००८ को बेइजिङ ओलम्पिकमा रजत पदक जितेका थिए । उनी पुरुष म्याराथनमा धेरै पदक जित्ने तेस्रो एथलिट बनेका छन् ।

नेदरल्यान्ड्सका एब्डी नाजिइले २ घन्टा ९ मिनेट ५८ सेकेन्डमा दुरी पार गर्दै रजत पदक हात पारे । बेल्जियमका बासिर एब्डीले २ घन्टा १० मिनेटमा दुरी पार गर्दै कास्यपदक जित्न सफल भए । अन्तिम समयमा फिनिसिङमा चुक्दा लरेन्स चेरोनोले चौथो स्थानमा चित्त बुझाए ।

केन्याको जारी ओलम्पिकमा यो चौथो स्वर्ण हो । केन्या ४ स्वर्ण, ४ रजत र २ कास्यगरी कुल १० पदक जित्दै पदक तालिकाको १९औं स्थानमा रहेको छ ।