एजेन्सी – उपाधिको बलियो दावेदार रसियन ओलम्पिक कमिटि (आरओसी) लाई स्तब्ध पार्दै फ्रान्सले टोकियो ओलम्पिक अन्तरगतको पुरुष भलिबलमा स्वर्ण जितेको छ ।

एरिएक एरिनामा शनिबार आरओसीको चुनौती ३–२ ले पन्छाउँदै फ्रान्सले स्वर्ण जित्न सफल भएको हो । फ्रान्सले समूह चरणमा पनि आरओसीलाई ३–१ को सेटमा हराएको थियो ।

प्रतिस्पर्धात्मक र रोमाञ्चक बनेको फाइनल भिडन्तमा फ्रान्सले सुरुवाती दुई सेट आफ्नो पक्षमा पार्दै जिततर्फ अघि बढेको थियो । तर त्यसपछिको दुई सेट गुमाएपछि खेल पाँचौ सेटमा लम्बिदा फ्रान्सले बाजी मार्न सफल भयो ।

पहिलो सेटममा फ्रान्सले १८–२२ को स्थिति उल्ट्याउँदै २५–२३ को जित निकाल्न सफल भएको थियो । दोस्रो सेटमा सुरुवातदेखि अग्रता लिएपनि मध्यतिर पुग्दा फ्रान्सले दवाव झेलेपनि २०–१७ को स्थितिबाट लगातार अंक जोड्दै २५–१७ खेल आफ्नो पक्षमा पार्न सफल भएको थियो । तेस्रो सेटमा १९–१९ को बराबरीको अवस्थाबाट लय गुमाएको फ्रान्सले थप २ अंक जोड्दा २१–२५ ले सेट गुमाउन पुग्यो ।

प्रतिस्पर्धात्मक चौथो सेट पनि फ्रान्सले २१–२५ ले नै गुमाउँदा खेल पाँचौ सेटमा लम्बिएको थियो । प्रतिस्पर्धात्मक पाँचौ सेटमा अग्रता लिएको फ्रान्सले १३–१२ को स्थितिबाट लगातार दुई अंक जोड्दै १५–१२ को जित निकाल्दै च्याम्पियन बन्न सफल भयो ।

फ्रान्सको जितमा अर्भिन नागापेथले सर्वाधिक २६ तथा पाट्रीले १५ अंकको योगदान दिए । आरओसीका मिखाएलोभले २१ तथा केलिउकाले २० अंकको योगदान दिएपनि हार टार्न सकेन ।

फ्रान्सले स्पाइकबाट ५७, ब्लकबाट ७ र सर्भिसबाट ९ अंक जोड्दा विपक्षीको गल्तीबाट ३४ अंक पाएको थियो । आरओसीले स्पाइकबाट ६०, ब्लकबाट ८ र सर्भिसबाट १ अंक जोड्दा विपक्षीको गल्तीबाट ३३ अंक पाएको थियो ।

त्यसअघि शनिबारै साविक विजेता ब्राजिललाई ३–२ को सेटमा स्तब्ध पार्दै अर्जेन्टिनाले तेस्रो स्थान हासिल गर्न सफल भएको थियो ।