एजेन्सी – अर्जेन्टिनाको चुनौती सोझो सेटमा पन्छाउँदै फ्रान्स टोकियो ओलम्पिक २०२० अन्तरगतको पुरुष भलिबलतर्फको फाइनलमा प्रवेश गरेका छन् ।

एरिएक एरिनामा बिहीबार भएको खेलमा फ्रान्सले अर्जेन्टिनामाथि ३–० को सोझो सेटमा जित निकाल्दै फाइनलमा रसियन ओलम्पिक कमिटि (आरओसी) सँगको भेट पक्का गरेको हो । आरओसीले बिहीबारै साविकको विजेता ब्राजिललाई ३–१ को सेटमा पराजित गर्दै फाइनलमा स्थान सुरक्षित गरेको थियो । फाइनल ७ अगस्टमा हुनेछ । सोही दिन तेस्रो स्थानको लागि खेल हुनेछ ।

पहिलो सेटमा २५–२२ को जित हात पारेको फ्रान्सले दोस्रो सेटमा २५–१९ को सहज जित निकाल्दै जित नजिक पुगेको थियो । तेस्रो सेटमा पनि फ्रान्सले २५–२२ कै जित निकाल्यो । फ्रान्सको जितमा पाट्रीले १५ तथा क्लेभेनटले १४ अंकको योगदान दिए । अर्जेन्टिनाका लागि कोन्टेले १३ तथा ब्रुनो लिमाले ८ अंकको योगदान दिएपनि हार टार्न सकेन ।

फ्रान्सले स्पाइकबाट ४१, ब्लकबाट १० र सर्भिसबाट ३ अंक जोड्दा विपक्षीको गल्तीबाट २१ अंक पाएको थियो । अर्जेन्टिनाले स्पाइकबाट ३४, ब्लकबाट ५ र सर्भिसबाट १ अंक जोड्दा विपक्षीको गल्तीबाट २३ अंक पाएको थियो ।

अर्जेन्टिना र ब्राजिलले तेस्रो स्थानको लागि खेल्नेछ । यि दुई टोलीले समूह चरणमा पछि पर्दा ब्राजिलले दुई सेटमा पछि परेको अवस्थामा ३–२ को जित निकालेको थियो ।