काठमाडौं (हाम्रो खेलकुदद) – एपिएफले प्रधानसेनापति चौथो अन्तर्राष्ट्रिय महिला फुटबल प्रतियोगितामा विजयी सुरुआत गरेको छ । विभागीय टोली एपिएफले पश्चिमाञ्चल टोलीलाई १५–० ले हरायो । अर्को खेलमा मध्यमाञ्चलले सुदूरपश्चिममाथि ७–० को जित हासिल गर्यो ।

एपिएपफ र पूर्वाञ्चलबीचको प्रतिस्पर्धा । फाइल तस्बिर

साबिक विजेता समेत रहेको एपिएफ पहिलो जितबाटै सेमिफाइनलमा पुगेको छ । भारतको बिहार टिम नआएपछि एपिएफले सेमिफाइनलमा आइतबार पुलिससँग प्रतिस्पर्धा गर्नेछ । अघिल्लो दिन दुई विभागिय टोली आयोजक नेपाल आर्मी र नेपाल पुलिस विजयी भएका थिए ।
लगनखेलस्थित आर्मीको फुटबल मैदानमा पश्चिमाञ्चलविरुद्ध सावित्री भण्डारी एक्लै हावी भइन् । उनी एक्लैले १० गोल गरिन् र खेलको वमन अफ दि म्याच बनिन् । सरु लिम्बु र रेखा पौडेलले २÷२ तथा अञ्जली योञ्जनले १ गोल गरिन् । एपिएफ साबिक विजेता टोली हो ।
अर्को खेलमा मध्यमाञ्चललाई जिताउन मनीषा रावत र रश्मीकुमारी घिसिङले समान ३ गोल गरे । अर्को गोल अञ्जु लोप्चनले गरिन् । मनीषा वुमन अफ दी म्याच घोषि तभइन् । शनिबार पहिलो खेल भारत बिहार टिम र नेपाल पुलिसबीच हुने भए पनि बिहार टोली उपस्थित भएन ।
नेपाली सेनाको आयोजना तथा अखिल नेपाल फुटबल संघ (एन्फा) को प्राविधिक सहयोगमा जारी प्रतियोगितामा ९ टिमले प्रतिस्पर्धा गरिरहेका छन् । प्रतियोगिता विजेताले ३ लाख, उपविजेताले १ लाख ५० हजार प्राप्त गर्नेछ । सेमिफाइनल पुग्ने टोलीले ५० हजार पाउने छन् । उत्कृष्ट खेलाडीले स्कुटर प्राप्त गर्नेछिन् ।