काठमाडौं (हाम्रो खेलकुद )– तेस्रो लक्ष्मी बैंक ओपन गल्फ प्रतियोगिताको उपाधि हेमन्त गुरुङले जितेका छन् । गोकर्ण फरेस्ट गल्फ रिसोर्टमा शनिबार स्टेबलफोर्ड पद्दतिअनुसार ३/४ ह्यान्डिक्यापमा खेलाइएको प्रतियोगितामा ८ ह्यान्डिक्यापका साथ खेलेका हेमन्तले ३९ स्कोरका साथ उपाधि जितेका थिए । उपाधिका साथ उनले २० हजार रुपैयाँ हात पारे ।

१ ह्यान्डिक्यापका साथ खेलेका वाङचेन धेन्दुप ३७ स्कोर गर्दै दास्रो बने र १२ हजार रुपैयाँ पाए ।५ ग्रस स्कोरका साथ टासी छिरिङले काउन्ट ब्याकमा उत्कृष्ट ग्रसको उपाधि जिते । टासी डोङसँग स्कोर बराबरी भएपछि काउन्ट ब्याकमा उनले उपाधि जितेका हुन् । छिरिङले १८ हजार रुपैयाँ पाए ।
महिलातर्फ ३३ स्कोर गरेकी प्रतिमा शेर्पाले उपाधि जितिन् र १० हजार रुपैयाँ प्राप्त गरिन् । सुल्टिन लामाले ६० वर्षमाथिको उपाधिका साथ ९ हजार पाइन् । श्रीयोग बस्न्यातले ३७ स्कोरसाथ जुनियरको उपाधिसहित ९ हजार रुपैयाँ जिते । निश्चयजंग रायमाझीले ३५ स्कोर गर्दै गेस्टतर्फको उपाधिसहित ८ हजार रुपैयाँ जिते ।
फुन्चोक लामाले लङ्गेस्ट ड्राइभको पुरस्कार जित्न १८ औं होलमा ३ सय ५३ यार्ड ड्राइभ गरेका थिए । पाँच बर्डी प्रहार गरेका टासी डोङले सर्वाधिक बर्डीको पुरस्कार जिते । क्लोजेस्ट टु दी पिनको अवार्ड भने आत्माराम सिम्खडाले जिते ।
लक्ष्मी बैंकका अध्यक्ष शम्भुप्रसाद आचार्य, प्रमुख कार्यकारी अधिकृत सुदेश खालिङ, गोकर्ण गल्फ क्लबका अध्यक्ष सुहृद घिमिरे तथा क्याप्टेन जोसेफ नाथनले विजेतालाई पुरस्कृत गरे । प्रतियोगितामा कुल ९६ खेलाडीले प्रतिस्पर्धा गरेका थिए ।