एजेन्सी – दक्षिण कोरियाले टोकियो ओलम्पिक २०२० अन्तरगतको महिला भलिबलमा टर्कीमाथि रोमाञ्चक जित निकाल्दै सेमिफाइनलमा स्थान बनाएको छ ।

एरिएक एरिनामा बुधबार भएको खेलमा दक्षिण कोरियाले टर्कीमाथि ३–२ को सेटमा रोमाञ्चक जित निकाल्दै अन्तिम चारको यात्रा तय गरेको हो । यो नतिजासँगै दक्षिण कोरियाले समूह चरणको भोगेको हारको बदला लिएको छ । दक्षिण कोरिया समूह चरणमा ३–० को सोझो सेटमा पराजित भएको थियो ।

सुरुवाती सेट १७–२५ ले गुमाएको कोरियाले दोस्रो र तेस्रो सेट क्रमशः २५–१७ र २८–२६ ले जित्दै खेलमा २–१ को सेटमा अग्रता लिएको थियो । चौथो सेट १८–२५ ले गुमाएपछि खेल पाँचौ सेटमा लम्बिएको थियो । प्रतिस्पर्धात्मक र रोमाञ्चक बनेको निर्णायक सेट कोरियाले १५–१३ ले आफ्नो पक्षमा पार्दै अन्तिम चारमा पुग्न सफल भयो ।

कोरियाको जितमा किम यिअन कोअङले सर्वाधिक २८ स्कोर गरिन् । टर्कीकी बोजले सर्वाधिक २४ स्कोर गरेपनि टोलीको हार टार्न सकेनन् । दक्षिण कोरियाले स्पाइकबाट ६३, ब्लकबाट १२ र सर्भिसबाट ४ अंक जोड्दा विपक्षीको गल्तीबाट २४ अंक पाएको थियो ।

टर्कीले स्पाइकबाट ६३, ब्लकबाट १६ र सर्भिसबाट ७ अंक जोड्दा विपक्षीको गल्तीबाट २० अंक जोडेको थियो । अब दक्षिण कोरियाले सेमिफाइनलमा ब्राजिल र रसियन ओलम्पिक कमिटि (आरओसी) बीचको विजेतासँग खेल्नेछ ।

अर्काे खेलमा अमेरिकाले डोमिनिकन रिपब्लिकमाथि २५–११, २५–२० र २५–१९ को सोझो सेटमा हराएको छ । अमेरिकाको सहज जितमा एन्ड्रिए ड्रिउसले सर्वाधिक २१ स्कोर गरिन् । उनले स्पाइकबाट मात्रै २१ अंक जोडेकी थिइन् । अमेरिकाले सर्विया र इटालीबीचको विजेतासँग सेमिफाइनलमा प्रतिस्पर्धा गर्नेछ ।

अर्काे क्वाटरफाइनलमा आज (बुधबार) सर्विया र इटाली तथा ब्राजिल र रसियन ओलम्पिक कमिटि (आरओसी) बीच प्रतिस्पर्धा हुदैछ । सेमिफाइनल शुक्रबार हुनेछ । फाइनल आइतबार हुनेछ ।