एजेन्सी – घरेलु टोली जापानलाई सोझो सेटमा पन्छाउँदै ब्राजिल टोकियो ओलम्पिक अन्तरगतको पुरुष भलिबलतर्फ सेमिफाइनलमा प्रवेश गरेको छ ।

मंगलबार भएको क्वाटरफाइनलमा उपाधि दावेदार ब्राजिलले जापानमाथि ३–० को सोझो सेटमा पराजित गर्दै अन्तिम चारमा स्थान सुरक्षित गरेको हो । एरिएक एरिनामा ब्राजिलले पहिलो सेट २५–२० ले आफ्नो पक्षमा पारेको थियो ।

दोस्रो सेटमा एक सयम खेलमा पछि रहेको ब्राजिलले पूनरागमन गर्दै २५–२२ ले आफ्नो पक्षमा पार्दै जित नजिक पुगेको थियो । सुरुवात देखि नै अग्रता लिएको ब्राजिलले तेस्रो सेट २५–२० ले जित्दै खेल आफ्नो पक्षमा पार्न सफल भयो ।

ब्राजिलले स्पाइकबाट ४७ र ब्लकबाट ८ अंक जोड्दा विपक्षीको गल्तीबाट २० अंक पाएको थियो , जापानले स्पाइकबाट ३६, ब्लक र सर्भिसबाट समान ४ अंक जोड्दा विपक्षीको गल्तीबाट १८ अंक पाएको थियो । ब्राजिलका लिलले १६ तथा वालेसले १३ स्कोर जोड्यो । जापानका युकी इसिकावाले १७ तथा युजी निसिदाले १३ स्कोर गरेपनि टोलीलाई जिताउन सकेन ।

अब सेमिफाइनलमा ब्राजिलले रसियन ओलम्पिक कमिटि (आरओसी) सँग प्रतिस्पर्धा गर्नेछ । यि दुई टोलीले समूह चरणमा प्रतिस्पर्धा आरओसीले ३–० को सोझो सेटमा जित निकालेको थियो । आरओसीले मंगलबारै क्यानडालाई २५–२१, ३०–२८ र २५–२२ को सोझो सेटमा पराजित गर्दै सेमिफाइनलमा स्थान बनाएको छ ।

अर्काे क्वाटरफाइनलमा आज (मंगलबार) इटाली र अर्जेन्टिना तथा पोल्यान्ड र फ्रान्सबीच प्रचिस्पर्धा हुदैछ । उक्त खेलपछि सेमिफाइनल समिकरण पुरा हुनेछ ।