एजेन्सी – टोकियो ओलम्पिक २०२० अन्तरगतको महिला भलिबलमा उपाधि दावेदार तथा बलियो इटाली चीनसँग सोझो सेटमा स्तब्ध बनेको छ ।

एरिएके एरिनामा शनिबार समूह ‘बी’ को खेलमा चीनले शीर्ष स्थानमा रहेको इटालीमाथि ३–० को सोझो सेटमा पराजित गरेको हो । पहिलो सेटमा २५–२१ को जित निकालेको चीनले दोस्रो सेटमा २५–२० को जित निकालेको थियो । प्रतिस्पर्धात्मक बनेको तेस्रो सेट चीनले २६–२४ को पार्दै इटालीलाई स्तब्ध बनायो ।

चीनको महत्वपुर्ण जितमा स्पाइकबाट ३७, ब्लकबाट १०, सर्भिसबाट १० र विपक्षीको गल्तीबाट २७ अंक पाएको थियो । इटालीले स्पाइकबाट ४३, ब्लकबाट ९ र सर्भिसबाट ३ अंक जोड्दा विपक्षीको गल्तीबाट १० अंक पाएको थियो ।

हारपछि इटाली ४ खेलबाट ९ अंक जोडेर शीर्षस्थानमा रहँदा जितका बावजुत चीनले अघिल्लो चरण पार गर्न असमर्थ बनेको छ । समूह चरणको अन्तिम खेलमा अर्जेन्टिनालाई पराजित गरेपनि टर्की बढी सेट जितेको आधारमा शीर्ष चारमा रहेर अघि बढ्नेछ ।

समूह ‘ए’ को अर्काे खेलमा दक्षिण कोरियाले घरेलु टोली जापानमाथि ३–२ को रोमाञ्चक जित निकालेको छ । पहिलो सेट २५–१९ ले सहजै जितेको दक्षिण कोरियाले दोस्रो सेट १९–२५ ले नै गुमाएको थियो । तेस्रो सेट २५–२२ ले जित्दै कोरियाले पुनः अग्रता लिएको थियो ।

चौथो सेट जापानले २५–१५ ले आफ्नो पक्षमा पारेपछि खेल पाँचौ सेटमा लम्बिएको थियो । रोमाञ्चक र प्रतिस्पर्धात्मक बनेको निर्णायक सेट दक्षिण कोरियाले १६–१४ ले आफ्नो पक्षमा पार्दै जित हासिल गर्न सफल भयो ।

यो नतिजापछि दक्षिण कोरिया ४ खेलबाट ९ अंक जोडेर तेस्रो स्थानमा यथावत रहँदा जापानले ४ अंक जोड्दै समूह चरण पार गर्ने सम्भावना जीवितै राखेको छ । जापानलाई समूह चरण पार गर्न अन्तिम खेलमा डोमिनिकन रिपब्लिकलाई हराउनुपर्ने हुन्छ ।