एजेन्सी – समूह चरणको एक खेल बाँकी छँदै ब्राजिल टोकियो ओलम्पिक २०२० अन्तरगतको महिला भलिबलतर्फ क्वाटरफाइनलमा पुग्न सफल भएको छ ।

समूह चरणको चौथो खेलमा सर्वियालाई ३–१ को सेटमा पराजित गर्दै ब्राजिलले समूह ‘ए’ बाट अन्तिम आठमा स्थान सुरक्षित गरेको हो । ब्राजिलसँगको हारको बावजुत पनि सर्विया पनि क्वाटरफाइनलमा पुग्न सफल भएको छ । दुई समूहबाट शीर्ष चार टोली क्वाटरफाइनल पुग्ने प्रावधान छ ।

एरिएके एरिनामा शनिबार भएको खेलमा ब्राजिलले पहिलो सेट २५–२० ले आफ्नो पक्षमा पारेको थियो । दोस्रो सेटमा २५–१६ को सहज जित निकालेको ब्राजिलले तेस्रो सेटमा अग्रता लिनका बावजुत २३–२५ ले गुमाउन पुगेको थियो । तर चौथो सेटमा २५–१९ को सहज जित निकाल्दै ब्राजिलले खेल आफ्नो पक्षमा पार्न सफल भयो ।

समूह चरणमा ब्राजिलको यो लगातार चौथो जित हो । सर्वियाले समूहमा पहिलो हार बेहोरेको हो । समूह चरणको अन्तिम खेलमा केन्यालाई हराउन सके ब्राजिल समूह विजेता बन्नेछ ।

ब्राजिलले स्पाइकबाट ५८, ब्लकबाट ७ र सर्भिसबाट २७ अंक जोड्दा विपक्षीको गल्तीबाट २७ अंक जोडेको थियो । सर्वियाले स्पाइकबाट ५३, ब्लकबाट १० र सर्भिसबाट २ अंक जोड्दा विपक्षीको गल्तीबाट १५ अक जोडेको थियो । सर्वियाकी टिजाना बोस्कोभिकले सर्वाधिक ३२ स्कोर गरेपनि टोलीलाई जिताउन सकेनन् ।

अपराजित रहेको ब्राजिल ४ खेलबाट ११ अंक जोडेर शीर्षस्थानमा रहेको छ । ब्राजिलसँग हार बेहोरेको सर्विया ९ अंक जोडेर दोस्रो स्थानमा रहेको छ । दक्षिण कोरिया र डोमिनिकन रिपब्लिकको समान ५ अंक छ । जापानको ३ तथा केन्याले अंकको खाता खोल्न सकेको छैन ।

यस्तै समूह चरणको अन्य खेलमा डोमिनिकन रिपब्लिकले केन्यामाथि ३–० को सहज जित निकाल्दै शीर्ष चारमा रहेर क्वाटरफाइनल पुग्ने सम्भावना जीवितै राखेको छ । एकपक्षीय खेलमा रिपब्लिकले केन्यामाथि २५–१९, २५–१८ र २५–१० को सहज जित हात पारेको थियो ।

समूह ‘बी’ को खेलमा रसियन ओलम्पिक टोली (आरओसी) ले अमेरिकालाई ३–० को सोझो सेटमा पराजित गरेको छ । एकपक्षीय खेलमा आरओसीले अमेरिकालाई २५–२०, २५–१२ र २५–१९ ले सहजै पन्छायो । यही समूहको अर्काे खेलमा टर्कीले अर्जेन्टिनालाई २५–२३, २५–२० र २५–१८ ले सहजै हराउँदै शीर्ष चारमा रहेर क्वाटरफाइनल पुग्ने सम्भावना जीवितै राखेको छ ।

यो नतिजापछि आरओसी ४ खेलबाट ८ अंक जोडेर दोस्रो स्थानमा रहँदा अमेरिका ८ अंकसहित तेस्रो स्थानमा रहेको छ । टर्की ७ अंक जोडेर चौथो स्थानमा रहँदा अंकविहीन अर्जेन्टिना पुछारमा रहेको छ ।

समूह ‘बी’ मा अपराजित रहेको इटाली ९ अंक जोडेर शीर्षस्थानमा रहेको छ । चीन १ अंक जोडेर पाँचौ स्थानमा छ । अहिले जापान र कोरिया तथा चीन र इटालीबीच प्रतिस्पर्धा भइरहेको छ ।