एजेन्सी – टोकियो ओलम्पिक अन्तरगतको पुरुष भलिबलमा ब्राजिलले अमेरिकालाई पराजित गरेको छ । शुक्रबार भएको समूह चरणको तेस्रो खेलमा ब्राजिलले अमेरिकामाथि ३–१ को सेटमा जित हात पारेको हो ।

प्रतिस्पर्धात्मक बनेको पहिलो सेट ३०–३२ ले गुमाएपनि त्यसपछिको तीनै सेट ब्राजिलले आफ्नो पक्षमा पार्न सफल भएको थियो । दोस्रो सेट ब्रजिलले २५–२३ ले आफ्नो पक्षमा पार्दै खेललाई बराबरीमा ल्याएका थिए । तेस्रो सेट २५–२१ ले जितेको ब्राजिलले चौथो सेट २५–२० ले आफ्नो पक्षमा पार्दै खेललाई आफ्नो पक्षमा पार्न सफल भयो ।

ब्राजिलले स्पाइकबाट ५८, ब्लकबाट ९ र सर्भिसबाट ७ अंक जोड्यो । अमेरिकाले स्पाइकबाट ७०, ब्लकबाट ७ र सर्भिसबाट ४ अंक जोड्यो ।
यो जितसँगै ब्राजिलले समूह ‘बी’ बाट क्वाटरफाइनलमा पुग्ने सम्भावना बलियो बनाएको छ । ब्राजिल ४ खेलबाट ८ अंक जोडेर दोस्रो स्थानमा रहेको छ । पराजित अमेरिका ६ अंक जोडेर तेस्रो स्थानमा रहेको छ ।

रसियन खेलाडीको टोली (आरओसी) को ९ अंक छ । फ्रान्सको ४ तथा अर्जेन्टिनाको ३ अंक रहँदा ट्युनिसियाले अंकको खाता खोल्न सकेको छैन । ६ टोली रहेको समूहबाट ४ टोलीले क्वाटरफाइनलमा स्थान बनाउनेछन् ।

यस्तै समूह ‘ए’ को खेलमा क्यानडाले भेनेजुएलामाथि ३–० को सहज जित हात पारेको छ । एकपक्षीय खेलमा क्यानडाले २५–१३, २५–२२ र २५–१२ को सहज जित निकालेको छ । पोल्यान्डले जापानलाई ३–० को सोझो सेटमा हराउँदै क्वाटरफाइनलमा स्थान पक्का गरेको छ । प्रतिस्पर्धात्मक खेलमा पोल्यान्डले जापानमाथि २५–२२, २५–२१ र २६–२४ को जित निकाल्यो ।

पोल्यान्डको ४ खेलबाट १० अंक जोडेर शीर्षमा रहेको छ । क्यानडाको ७ अंक छ । जापानको ६, इरान र इटालीको समान ५ अंक तथा भेनेजुएलाले अंकको खाता खोल्न सकेको छैन ।