काठमाडौं (हाम्रो खेलकुद) – फुटसल व्यवसायीहरुको छाता संगठन नेपाल फुटसल व्यवसायी संघले गत बैशाखदेखि बन्द रहेको फुटसल सञ्चालन गर्ने निर्णय गरेको छ ।

संघले बिहीबार एक विज्ञप्ति जारी गर्दै कोरोना भाइरस (कोभिड–१९) को महामारीपछि निषेधाज्ञापछि बन्द रहेको फुटसल खोल्ने निर्णय गरेको संघका अध्यक्ष राज महर्जन र महासचिव मदन कोइरालाले जारी गरेको विज्ञप्तिमा उल्लेख छ ।

निषेधाज्ञा पनि खुकुलो बनाएको अवस्थामा बन्द रहेको फुटसल सञ्चालनको लागि संघले जिल्ला प्रशासन कार्यालयमार्फत सावधानी अपनाई खेल सञ्चालनको अनुमतिका लागि ज्ञापन पत्र बुझाएपनि सरकार उदासिन छ ।

हामीले बुझाएको ज्ञापनपत्रमा खेल सञ्चालन गर्दा ५–५ एक आपसमा खेल्ने, प्रतियोगिता नगराउने, खेलाडीको तापक्रम नाप्ने, साबुन पानीले हात धुने, शौचालयलगायत फुटसल एरियालाई कीटाणुरहित बनाउने, मास्क र स्यानिटाइजरको व्यवस्था गर्ने प्रतिबद्धता जाहेर गर्दै काठमाडौं जिल्ला प्रशासनलगायतसँग सम्वन्धित निकायसँग आग्रह गर्दा पनि उदासिनता देखाएपछि संघले बाध्य भएर बिहीबारदेखि सावधानी अपनाई फुटसल सञ्चालन गर्न बाध्य भएको विज्ञप्तिमा उल्लेख छ ।

‘सरकारले यस क्षेत्रमा ध्यान नदिदा जग्गाको भाडा, बैंकको ब्याज, कर्मचारीको पारिश्रमिकले यस क्षेत्रको व्यवसायीलाई सताएको छ ।’ संघले जारी गरेको विज्ञप्तिमा भनिएको छ, ‘यसतर्फ सरकारको ध्यान जाओस् । हामी व्यवसायी बाध्य भएर बिहीबारबाट सावधानी अपनाई खेल संचालन गर्न बाध्य भएका छौं ।’

नेपाल सरकारले होटल, रेष्टुरेन्ट, सार्वजनिक यातायात लगायत भिडभाड हुने क्षेत्रलाई खोल्ने निर्णय गरेपनि समूहमा खेलिने खेल र गतिविधि गर्न प्रतिबन्ध लगाएको छ । सरकारले काठमाडौं उपत्यकामा २० साउनसम्म निषेधाज्ञा लम्ब्याएको छ ।