काठमाडौं (हाम्रो खेलकुद) –नेपाली राष्ट्रिय पुरुष भलिबल टोलीका सदस्य रहिसकेका सशस्त्र प्रहरी बल (एपिएफ) क्लबका मुख्य सेटर लोकेन्द्र गिरीको घुँडाको सफल शल्यक्रिया भएको छ ।

लामो समयदेखि बायाँ घुँडाको समस्याले ग्रसित लोकेन्द्रको सोमबार एपिएफ अस्पतालमा सफल शल्यक्रिया भएको हो । डाक्टर शैलेन्द्र श्रेष्ठ र प्रविन नेपाल लगायतको टोलीले उनको शल्यक्रिया गरेको थियो । गिरीले दुई वर्षअघि नै मिनिस्कस र एमसिएलको चोट बोकेका थिए ।

तीन महिना फिजियो गरेपछि खेलमा फर्किएका गिरीले दुखाइका बाबजुद निरन्तर खेलेका थिए । गत चैतमा काठमाडौंमा भएको पाँचौ संस्करणको आरबीबी एनभिए कप राष्ट्रिय महिला तथा पुरुष क्लब लिग भलिबलको तीन पाकिस्तानी खेलाडी सम्मिलि बुलबुले राराविरुद्धको खेलमा उनको चोट थप बल्झिएको थियो ।

त्यतिबेला उनको मिनिस्कस च्यातिएको थियो । तर, पनि उनले इन्जेक्सन लिँदै खेलेका उनले टोलीको फाइनल यात्रासम्म खेलेका थिए । फाइनलमा भने एपिएफ हेल्प नेपाल स्पोर्ट्स क्लबसँग ३–० को सोझो सेटमा पराजित भएको थियो ।

चोट बल्झिएको झन्डै चार महिनापछि उनको घुँडाको शल्यक्रिया भएको हो । गिरीले मंगलबारदेखि नै फिजियो सुरु गरिसकेका छन् । अब उनी कम्तीमा पनि ८ महिना मैदान बाहिर रहनेछन् । एपिएफ अस्पतालमा नै फिजियोको सुविधा रहेपनि केही समयपछि आफुलाई सहज हुने ठाँउमा फिजियोको लागि जाने गिरीले बताए ।

तत्कालिन सुदूरपश्चिमाञ्चल विकास क्षेत्रको कप्तानसमेत रहेका कञ्चनपुरका गिरी ९ वर्षअघि एपिएफमा आबद्ध भएका थिए । त्यसअघि उनी कञ्चनपुरकै बाहिनीमा करारमा कार्यरत थिए । त्यसपछि सिपाहीमा भर्ना भएका उनी एपिएफ क्लबसम्म आउन सफल भएका थिए ।

लोकेन्द्रले राष्ट्रिय टोलीबाट पनि नेपालको प्रतिनिधित्व गरिसकेका छन् । २०७४ मा बंगलादेश र डेनमार्कको टोलीसँगको मैत्रीपुर्ण खेलमा गिरी टोलीमा रहेका थिए । उनले बंगलादेशसँगको १ सेट खेलेका थिए ।