एजेन्सी – टोकियो ओलम्पिक २०२० अन्तरगतको पुरुष भलिबलको समूह चरणको खेलमा उपाधि दावेदार ब्राजिलले अर्जेन्टिनामाथि पूनरागमन जित निकालेको छ ।

आरीआके एरिनामा सोमबार राति भएको खेलमा ब्राजिलले सुरुवाती दुई सेट गुमाएपनि त्यसपछिको तीनै सेट आफ्नो पक्षमा पार्दै पूनरागमन जित दर्ता गरेको हो । ब्राजिलले पहिलो सेट १९–२५ तथा दोस्रो सेट २१–२५ ले गुमाएको थियो ।

तेस्रो सेट २५–१६ ले आफ्नो पक्षमा पार्दै ब्राजिलले खेलमा फर्कने संकेत दिएको थियो । चौथो सेटमा ३–३ को बराबरीबाट पछि परेको ब्राजिलले ४–१० हुदै ११–१७ ले पछि परेको अवस्थामा लगातार ५ अंक जोड्दै खेलमा फर्कने संकेत दिए । १८–१८ को बराबरीबाट अघि बढेको ब्राजिलले अर्जेन्टिनालाई २५–२१ मा रोक्दै खेललाई २–२ सेटमा ल्याउदै खेललाई रोमाञ्चक मोडमा ल्याए ।

प्रतिस्पर्धात्मक बनेको निर्णायक सेट ब्राजिलले १६–१४ ले आफ्नो पक्षमा पार्दै पूनरागमन जित निकाल्न सफल भयो । निकै नै प्रतिस्पर्धात्मक बनेको पाँचौ सेटमा ब्राजिलले १२–१२ को बराबरीको अवस्थाबाट जिततर्फ अघि बढेको थियो ।

ब्राजिलले स्पाइकबाट ६०, ब्लकबाट ९ तथा सर्भिसबाट ५ स्कोर गरे । ब्राजिलका लागि स्पाइकबाट लिल हिडालले सर्वाधिक १७ तथा डि सुजा वालेसले १२ अंक जोडे । सौजा रिकार्डाे लुकारेलीले ब्लक र सर्भिसबाट समान ३ अंक जोडे ।

अर्जेन्टिनाले स्पाइकबाट ६८, ब्लकबाट ११ र सर्भिसबाट २ स्कोर मात्रै ग¥यो । अर्जेन्टिनाका लिमा ब्रुनोले स्पाइकबाट सर्वाधिक २२ स्कोर गरेपनि हार टार्न सकेन । पालासिओसले १८ तथा कोन्टे फकुन्डेले १४ स्कोर गरे । लोसर अगस्टिनले ४ तथा सोल सेवास्टिनले ३ ब्लक गरे । सर्भिसमा लिमा ब्रुनोले २ स्कोर गरे ।

जितपछि पोल ‘बी’ मा रहेको ब्राजिल २ खेलबाट ५ अंक जोड्दै दोस्रो स्थानमा रहेको छ । लगातार दोस्रो हार बेहोरेको अर्जेन्टिना १ अंक जोडेर पाँचौ स्थानमा रहेको छ । शीर्ष स्थानमा रहेको (आरओसी) रसियन टोली लगातार दोस्रो जित दर्ता गर्दै शीर्षस्थानमा रहेको छ ।

अमेरिका र फ्रान्स समान ३ अंक जोडेर तेस्रो र चौतो स्थानमा रहँदा ट्युनिसिया अंकविहीन हुदै पुछारमा छ । ६ टोली रहेको यो समूहबाट शीर्ष चार टोलीले क्वाटरफाइनलमा स्थान बनाउनेछन् ।