काठमाडौं (हाम्रो खेलकुद) – नेपाल ब्याडमिन्टन कम्युनिटी (एनबिसी) युएईको स्थापनासँगै युएईमा नेपाली समुदायमा ब्याडमिन्टन खेलप्रतिको मोह निकै नै बढेको छ ।

हरेक साताजस्तै हुने विभिन्न समुदायस्तरको प्रतियोगिता, केही अन्तर्राष्ट्रिय प्रतियोगिता र त्यसमा उत्साहजनक सहभागिताले पनि युएईमा रहेको नेपालीमा ब्याडमिन्टन खेलप्रतिको मोह कति छ भन्ने स्पष्ट पार्दछ । पछिल्लोपटक एनबिसीले ए प्लस मिक्स डबल्स, ए, बी प्लस मिक्स डबल्स र बी डबल्स गरी चार स्पर्धामा आन्तरिक प्रतिस्पर्धाको आयोजना गरेको थियो । जसमा २४ टोलीको सहभागिता रहेको छ ।

ए प्लस मिक्स डबल्समा तीन टोलीको सहभागिता रहँदा सुमन उदय र मिलन थापाको जोडीले उपाधि जिते । प्रमित उदय र टक सुनुवारको जोडीले दोस्रो स्थान हासिल गरे ।

ए मा ७ टिमको सहभागिता रहँदा साहिल चन्द र सानिया चन्दको जोडीले उपाधि जित्दा नरजङ तामाङ र किरण खत्रीको जोडी दोस्रो भए । बी प्लस मिक्स डबल्समा ८ टोलीको सहभागिता रहँदा सुर्य राई र प्रकाश खत्रीको जोडी पहिलो हुदा सुदिप कार्की र रुद्र थापाको जोडीले दोस्रो स्थान हासिल गरे । बी डबल्समा ६ टिमको सहभागिता रहँदा खेम संग्रौला र भुवन सिंह आलेको जोडीले उपाधि जित्दा किशोर शाक्य र जिएन शर्माको जोडीले दोस्रो स्थान हासिल गरे । विजेता र उपविजेता टोलीले नगदसँगै ट्रफी हात पारे ।

खेलहरु कोभिडको प्रोटोकलको पालना गर्दै सीमित दर्शक राखेर खेलाइएको थियो । खेलहरु दुवईस्थित नेपाली ब्याडमिन्टन प्रशिक्षक, एनबिसीका संस्थापक र पुर्व राष्ट्रिय खेलाडी बिक्की बुढामगरले प्रशिक्षण गराउने ब्याडमिन्टन स्पोर्ट्स हलमा भएको थियो । खेलहरु बिडब्लुएफको नियममा नै भएको थियो ।

प्रतियोगिताको संयोजन एनबिसीका अध्यक्ष हिरा लाल श्रेष्ठले गरेका थिए । सहसंयोजनमा उदय श्रेष्ठ र प्राविधिक सहयोग दीपेश श्रेष्ठ लगायतले गरेका थिए । प्रतियोगितालाई विभिन्न संस्थामा आबद्ध व्यक्तित्वहरु प्रकाश कार्की, कमल गुरुङ, सुवु केसी, कमल क्षेत्री, प्रमित उदय र पुरुषोत्तम ओलीलगायतले सहयोग गरेका थिए ।