काठमाडौं (हाम्रो खेलकुद) – एथलेटिक्सकी प्रशिक्षक इन्द्रकुमारी मल्ललाई कोरोना संक्रमण पुष्टि भएपछि उनको स्थानमा एपिएफका प्रशिक्षक सन्तोष श्रेष्ठ टोकियो ओलम्पिक जाने भएका छन् । टोकियो ओलम्पिककी सहभागी सरस्वती चौधरीको प्रशिक्षकका रुपमा मल्ल त्यसतर्फ जाने तयारीमा थिइन् ।

नेपाल ओलम्पिक कमिटी (एनओसी) ले आइतबार विज्ञप्ति जारी गर्दै मल्लको स्थानमा यसअघि ओलम्पिकको लङ लिस्टमा रहेका श्रेष्ठ जाने उल्लेख गरेको छ । यस विषयमा नेपाल एथलेटिक्स संघ र एनओसीबीच छलफल भएको बताइएको छ ।

नेपालको तर्फबाट एथलेटिक्समा प्रशिक्षकको रुपमा मल्ल सहभागी हुने निर्णय भएअनुसार उनको सहभागिताको लागि आवश्यक तयारीको सिलसिलामा कोभिड १९ को पिसिआर परिक्षण गर्दा रिपोर्ट पोजेटिभ आएको विज्ञप्तीमा उल्लेख छ । टोकियो ओलम्पिक २०२० को आयोजक कमिटिको कोभिड सम्बन्धी नियमअनुसार कोरोना पुष्टि भइसकेपछि सहभागी गराउन नमिल्ने भएकाले उनको स्थानमा पहिलेको सुचीमा एक्रिडेसन कार्ड भैसकेका प्रशिक्षक श्रेष्ठ जाने भएको एनओसीले जनाएको छ ।

एनओसीले प्रशिक्षक मल्ललाई कोरोना पुष्टि भएको पत्र जानकारी राष्ट्रिय खेलकुद परिषद (राखेप) लाई पठाएको राष्ट्रिय टिम तयारी समितिका संयोजक महेन्द्र राईले बताए । अब ओलम्पिकको लागि जाने तय भएको प्रशिक्षक श्रेष्ठको पनि लगातार कोरोना परिक्षण हुनेछ । श्रेष्ठ ओलम्पिक जानबाट वञ्चित पारिएका धावक गोपीचन्द्र पार्कीका प्रशिक्षक हुन् । गोपी जान नपाउने भएपछि उनको ठाँउमा सरस्वतीलाई पठाउने निर्णय भएको थियो । सरस्वतीको प्रशिक्षकमा मल्लको सिफारिस भएको थियो ।

एथलेटिक्स टोली २५ जुलाईमा टोकियो जाने तालिका छ । सरस्वती १ सय मिटर दौडमा प्रतिस्पर्धा गर्नेछिन् । नेपालबाट ३ खेलका टोलीहरु जापान पुगिसकेको छ । पौडी टोली अघिल्लो साता नै टोकियो पुगिसकेका छन् । जुडो र सुटिङ टोली शुक्रबार जापान प्रस्थान गरिसकेको छ । ओलम्पिक साउन ८ देखि २४ गते सम्म हुनेछ ।

५ खेलाडी ४ प्रशिक्षकसहित २६ जनाको टोली ओलम्पिकमा सहभागिता हुने भएको थियो । त्यसमध्ये एथलेटिक्सका व्यवस्थापकका रुपमा रहेका राखेपका उपाध्यक्ष शिव कोइरालाले भने व्यक्तिगत कारण देखाउँदै नजाने बताइसकेका छन् ।