काठमाडौं (हाम्रो खेलकुद) – बाराको निजगढ –२ सिंगौलमा आयोजित ‘निजगढ सिटीकप’ मार्शल आर्टस् फेस्टिबलमा बागमती प्रदेश टिम च्याम्पियन बनेको छ ।

२९ देखि ३१ असारसम्म भएको मार्शल आर्टस् फेस्टिबल अन्तर्गत पुरुष खुल्ला आइटिएफ तेक्वान्दोमा बागमति प्रदेशका निराजन दिम्बम र महिला खुल्ला फुलकन्ट्याक्ट करातेमा तारा घलानले स्वर्ण जित्दै जनही नगद ५० हजार हात पारेका छन् ।

त्यस्तै आइटिएफ तेक्वान्दोतर्फ प्रदेश १ का मिशन तामाङले रजत पदकसहित २५ हजार तथा प्रदेश १ कै आशिष क्षेष्ठले कास्य पदकसहित १० हजार जितेका छन् । फुलकन्ट्याक्ट करातेतर्फ प्रदेश २ की निसिदा आलेले रजत जित्दै २५ हजार हात पारिन् । प्रदेश २ कै स्नेहा महतो र बागमती प्रदेशकी सोनु तामाङले कास्य जिति १० हजार पाउन सफल भए ।

प्रतियोगितामा ७ प्रदेश र आयोजकबाट खेलाडी, कोच, टिम मेनेजर, रेफ्रि र जुरीगरी १३२ जना सहभागिता रहेको नेपाल तेक्वान्दो महासंघका अध्यक्ष एवं आयोजक कमिटीका सभापति दिनेश शर्माले जानकारी दिए ।

त्यस्तै विशेष मनोरन्जन विधामा समावेश गरिएको ८०० मिटर बुहारी दौडमा निजगढ २, सिंगौलकी अन्जु घिसिङ पहिलो हुदै १५ हजार हात पार्न सफल भइन् । वडा नं. २ कै मिन कुमारी शाहीले दोस्रो स्थान हात पार्दै १० हजार जित्न सफल भईन् । तृतिय स्थान निजगढ ३, सिंगौलकै पूर्णिमा थिङले जित्न सफल भई नगद ५ हजार हात पारिन् । दौडमा ३० जनाको सहभागिता थियो ।

नेपाल तेक्वान्दो महासंघको आयोजना, नेपाल राष्ट्रिय मार्शल आर्टस् गेम्स महासंघको तत्वधान र निजगढ नगरपालीकाको सहयोगमा आयोजित उक्त प्रतियोगिता २ नंं प्रदेशकै उच्चस्तरको रहेको बुझिएको छ ।