काठमाडौं (हाम्रो खेलकुद) – राष्ट्रपति विद्यादेवी भण्डारीले जापानमा आयोजना हुने ३२औं गृष्मकालीन टोकियो ओलम्पिक २०२० मा सहभागी हुने नेपाली टोलीलाई बिदाई गरेकी छन् ।

बिहीबार राष्ट्रपति कार्यालय शीतल निवासमा राष्ट्रपति भण्डारीले टोकियो ओलम्पिकमा हभागी हुने खेलाडी, प्रशिक्षक र व्यवस्थापकहरुलाई सफलताको शुभकामनासहित बिदाई गरेको राष्ट्रपति कार्यालयबाट जारी विज्ञप्तिमा जनाइएको छ ।

टोकियो ओलम्पिक २०२० मा नेपालबाट ४ खेलमा ४ प्रशिक्षक, ५ खेलाडीसहित २६ सदस्यीय टोली जापान प्रस्थान गर्नेछ । पौडी टोली जापान पुगिसकेको छ । अन्य टोली तीन देखि चार चरणमा जापान पुग्ने नेपाल ओलम्पिक कमिटिले जनाएको छ । सहभागी हुने खेलाडीमा पौडीका गौरिका सिंह र एलेक्जान्डर गाडेगार्ड शाह, सुटिङका कल्पना परियार, जुडोका सोनिया भट्ट तथा एथलेटिकसका सरस्वति चौधरी रहेका छन् ।

गौरिकाले वुमेन्स १०० सय मिटर फ्रि स्टाइल र एलेन्जान्डरले मेन्स १०० मिटर फ्रि स्टाइलमा खेल्नु हुनेछ । कल्पनाले वुमेन्स १० मिटर एयर राइफल, सानियाले वुमेन्स ४८ केजी तौल समूह तथा सरस्वतिले वुमेन्स १०० मिटर दौडमा सहभागिता जनाउने छन् । प्रशिक्षकमा पौडीका शंकर कार्की, सुटिङका असिम यादव, जुडोका सूर्यनारायण श्रेष्ठ र एथलेटिक्सकी इन्द्राकुमारी मल्ल छन् ।

पौडीका दुई र एथलेटिक्सका एक खेलाडीले ‘युनिभर्सियालियाटी प्लेस’ अन्तर्गत खेलमा सहभागिता जनाउने छन् भने बाँकी दुई खेलाडी आमान्त्रित अर्थात ‘वाइल्ड कार्ड’ को आधारमा सहभागी हुनेछन् । नेपाली टिमको ‘सेफ द मिसन’ राष्ट्रिय खेलकूद परिषदको सदस्य सचिव रमेश कुमार सिलवाल छन् । उद्घाटन समारोहमा आयोजना हुने मार्च पासमा गौरिका सिंह र एलेक्स शाहले संयुक्त रुपमा नेपाली झण्डा बोकेर नेपालको प्रतिनिधित्व गर्नेछिन् ।

टोकियो ओलम्पिक २०२० यही सन् २०२१ को जुलाई २३ देखि अगस्ट ८ सम्म आयोजना हुनेछ । कोरोना भाइरस संक्रमणको महामारीका कारण निर्धारित समयमा स्थगन भएको टोकियो ओलम्पिक एक वर्षको अन्तरालमा सुरु हुँदा नेपालको सहभागिताको सबै तयारी पूरा भइसकेको नेपाल ओलम्पिक कमिटि (एनओसी) ले यसअघि नै बताइसकेको छ ।