काठमाडौं (हाम्रो खेलकुद) – नेपाल इक्वेस्ट्रियन एसोसिएसन (नेपाल घोडचढी संघ)ले एशियन इक्वेस्ट्रियन फेडरेशन (एईएफ)को अस्थायी सदस्यता प्राप्त गरेको छ ।

एसियाका क्रियाशील २८ देश सम्मिलित एशियन इक्वेस्टेरियन फेडरेशनको बिहीबार बसको साधारण सभा (भर्चुअल)ले नेपाल इक्वेस्ट्रियन संघलाई अस्थायी सदस्यता दिने निर्णय गरेको हो ।

उक्त साधारणसभाको एजेन्डा १५.१ अनुसार नेपाललाई सदस्यता दिने निर्णय भएको नेपाल इक्वेस्ट्रियन संघका अध्यक्ष रवि राजकर्णिकारले जारी गरेको विज्ञप्तिमा उल्लेख छ । नेपालसहित दक्षिण एसियाली अर्को देश श्रीलंकाले समेत सदस्यता प्राप्त गरेको छ ।

गत नोभेम्बरमा अन्तर्राष्ट्रिय इक्वेस्ट्रियन फेडरेशन (एफआईआई) को महासभाले नेपाल इक्वेस्ट्रियन एसोसियसनलाई अस्थायी सदस्यको रूपमा अनुमोदन र मान्यता दिइसकेको छ । एसियन र अन्तर्राष्ट्रिय फेडरेशनका प्रतिनिधिले नेपाल भ्रमणपछि पूर्ण सदस्यको रूपमा मान्यता दिइने पनि हामीलाई जानकारी गराईएको छ ।

कोभिड १९ को महामारीवाट संसारले मुक्ति पाउने बित्तिकै अन्तर्राष्ट्रिय र एसियन फेडरेशनका प्रतिनिधि नेपाल भ्रमणमा आउने तालिका छ । हालै संघलाई अन्तर्राष्ट्रिय ‘टेन्ट पेगिंग’ महासंघ (आईटीपीएफ) को पूर्ण–सदस्यको रूपमा अनुमोदन र स्वीकृत गरिसकेको छ ।