एजेन्सी – विश्व नम्बर एक सर्बियन नोभाक जोकोभिचले विम्बल्डन टेनिसको च्याम्पियन बनेको छ । सेन्टर कोर्टमा सातौ वरियताका इटालीका माटियो बेरेटिनीसँग सुरुवाती सेट गुमाएर पनि जोकोभिचले पूनरागमन गर्दै उपाधि जित्न सफल भएका हुन् ।

लन्डनमा आइतबार राति भएको फाइनलमा इटालीका माटियो बेरेटिनीलाई ३–१ को सेटमा पराजित गर्दै जोकोभिकले छैटौपटक विल्मल्डन जितेका हुन् । प्रतिस्पर्धात्मक पहिलो सेट बेरेटिनीले ६–७ (४–७) ले आफ्नो पक्षमा पारेको थियो ।

तर, त्यसपछि बेरेटेनीले शीर्ष वरियताका जोकोभिचलाई ठुलो चुनौती दिन सकेन । यता, पहिलो सेट गुमाएको जोकोभिचले त्यसपछि दोस्रो सेट ६–४ ले आफ्नो पक्षमा पार्दै खेलमा फर्किएको थियो । तेस्रो सेटमा पनि ६–४ कै सहज जित निकालेको जोकोभिचले चौथो सेट ६–३ ले सहजै आफ्नो पक्षमा पार्दै उपाधि जित्न सफल भयो ।

विम्वल्डनको उपाधिसँगै ३४ वर्षीय जोकोभिचले लगातार दोस्रो पटक उपाधि जितेका छन् । जोकोभिचले यसअघि फ्रेन्च ओपनको उपाधि जितेको थियो । जोकोभिचको यो करियर २० औं ग्राण्डस्लाम उपाधि समेत हो । जोकोभिचले स्विस स्टार रोजर फेडेरर र स्पेनिस स्टार राफायल नाडालले बनाएको सर्वाधिक ग्राण्डस्लाम जित्ने खेलाडीको कीर्तिमानसँग बराबरी समेत गरेका छन् ।

महिलातर्फको उपाधि विश्व नम्बर एक अष्ट्रेलियाकी अस्लेइग बार्टीले जितिसकेकी छिन् । बार्टीले पहिलोपटक विम्बल्डनको उपाधि जितेकी हुन् । बार्टीको यो दोस्रो ग्राण्डस्लाम उपाधि हो । यस अघि उनले फ्रेन्च ओपन जितेकी थिइन् ।