काठमाडौं (हाम्रो खेलकुद) – सैनिक मुख्यालय जङ्गी अड्डाले ओलम्पिकका लागि छनोट भएका विभागीय टिम त्रिभुवन आर्मी क्लबका दुई खेलाडीलाई बुधबार बधाई तथा शुभकमनासँगै सम्मान प्रदान गरेको छ ।

प्रधानसेनापति पूर्णचन्द्र थापाले ओलम्पिकलाई छनोट हुन सफल दुई खेलाडीलाई बधाई तथा शुभकामना प्रदान गर्दै सम्मान स्वरुप खेल सामग्रीसहितको झोला हस्तान्तरण गरे ।

प्रधानसेनापति थापाले मुलुकको खेलकूद क्षेत्रको विकासमा सेनाले गौरव गर्न लायक रूपमा दिँदै आएको योगदान र निरन्तरका आधारमा हालसम्म संगठनका २४ खेलाडीले ओलम्पिकमा आफ्नो कौशल प्रस्तुत गर्न सफल भएको बताए । ‘ओलम्पिकमा सहभागी हुन पाउनु सेना र राष्ट्रका लागि महत्वपूर्ण अवसर हो । सैनिक खेलाडीलाई खेलविधामार्फत नेपाल र नेपालीको प्रतिष्ठा बढाउने अवसर प्राप्त भएको छ ।’ प्रधानसेनापति थापाले भने ।

सरस्वती भट्टराईले १०० मिटर स्पिन्टमा तथा कल्पना परियारले १० मिटर एयर राइफलमा नेपालको चुनौती पेश गर्नेछन् । दुवै सेनामा सिपाही दर्जामा रहेका छन् । ट्रयाक एन्ड फिल्डकी सरस्वतीले अन्तिम समयमा टोकियो ओलम्पिकको लागि वाइल्ड कार्ड प्राप्त गरेका थिइन् ।

यसअघि एपिएफकी गोपीचन्द्र पार्कीले म्याराथनमा सहभागिता जनाउने पक्का पक्की जस्तै थियो । तर, उनी अन्तिम समयमा ओलम्पिकबाट वञ्चित बन्न पुगे । टोकियो ओलम्पिकमा सरस्वती र कल्पनासँगै पौडीकी गौरिका सिंह र एलेक्सजन्डर शाह र जुडोकी सोनिया भट्टले खेल्नेछिन् ।