काठमाडौं (हाम्रो खेलकुद) – बन्दी सहायता नियोग (पाम) ले मैत्रीपुर्ण जुडो प्रतियोगिता आयोजना गर्दै ओलम्पिक डे २०२१ मनाएको छ । पामले आफ्नो डोजो पाम जुडो डोजो एकलटार रानीबनमा चार समुह बनाई जुडो प्रतियोगिता आयोजना भएको हो ।

बेस्ट अफ थ्रीको आधारमा ३६ खेलाडीले सहभागिता जनाएको प्रतियोगितामा ५ देखि १० समूह ‘ए’, १० देखि १४ समूह ‘बी’, १५ देखि १८ समूह ‘सी’ र १८ देखि २१ वर्षसम्मलाई समूह ‘डी’ गरी चार समूह बनाइएको थियो ।

जसमा ५ स्वर्णपदक र ३ रजतपदकसहित कुल ८ पदक जितेको समूह ‘बी’ च्याम्पियन बन्न सफल भयो । ४ स्वर्ण, ५ रजतपदक र १ कास्यपदक गरी १० पदक जितेको समूह ‘ए’ दोस्रो भयो । समूह ‘डी’ ले ४ स्वर्ण, ४ रजत र १ कास्यगरी ९ पदक जित्दै तेस्रो स्थान हासिल गर्दा समूह ‘सी’ ले ४ स्वर्ण र ४ रजतपदक गरी ८ दिक जित्न सफल भयो ।

ओलम्पिक डेको अवसरमा भएको प्रतियोगिताको विजयी खेलाडी तथा टिमलाई बाल बिकास माविका प्रधानाध्यापक प्रेम लो तामाङ, पामको संस्थापक जुडो प्रशिक्षक तथा कार्यकारी निर्देशक सुर्य नारायण श्रेष्ठ, नेपाल जुडोका मुख्य प्रशिक्षक तथा अन्तर्राष्ट्रिय रेफ्री विरेन्द्र रन्जित, नेपाल जुडो संघका महासचिव तथा अन्तर्राष्ट्रिय रेफ्री धर्मकुमार श्रेष्ठ र पाम संस्थानको व्यवस्थापन प्रमुख लक्ष्मण कुमार श्रेष्ठ लगायतले पुरस्कृत गरे । पाम संस्थाको अध्यक्ष डा.नारायण काजी श्रेष्ठले ओलम्पिक डे मनाउँदै गरेको अवस्थामा शुभकामना व्यक्त गरेका थिए ।

पछिल्लो समय पामबाट राष्ट्रिय खेलाडी उत्पादन भइसकेका छन् । मनिता प्रधान श्रेष्ठ, इन्द्र बहादुर श्रेष्ठ, सुदेश दोङ, रोशन ब दोङ, देवकी माया श्रेष्ठ, रत्न तामाङ, रुक्सना खातुन, जनक पाख्रिन तामाङ, राजु शर्मा, सुवोध मन्डल र प्रमोद मण्डल पामले उत्पादन गरेका राष्ट्रिय खेलाडी हुन् ।

पाममा अहिले ३० जनाले नियमित प्रशिक्षण गर्दै आइरहेका छन् । पाम बाहिरका ६ जना भन्दा बढी खेलाडी पनि नियमित प्रशिक्षणमा आउने पामको संस्थापक जुडो प्रशिक्षक तथा कार्यकारी निर्देशक सुर्य नारायण श्रेष्ठले जानकारी गराए ।