काठमाडौं (हाम्रो खेलकुद) – नेपाली ब्याडमिन्टन कम्युनिटी (एनबीसी) ले संयुक्त अरब इमिरेट्स (युएइ)) स्थित दुवईमा सम्पन्न बिच एयर ब्याडमिन्टन कम्युनिटी प्रतियोगितामा दोस्रो स्थान हात पारेको छ ।

दुवईस्थित जुमिरहामा रहेको बिच भलिबल कोर्टसँगैको खेल मैदानमा भएको प्रतियोगितामा नेपाल बलियो श्रीलंकाको कम्युनिटी (समुदाय) सँग समग्रमा १००–६१ ले पराजित हुदै दोस्रो स्थान हासिल गरेको हो ।

विश्व ब्याडमिन्टन फेडेरेसन (बिडब्लुएफ) ले २०१९ मै प्रतिपादित यो खेल बिडब्लुएफको रेली प्वाइन्ट पद्धतिको आधारमा भएको अन्तर्राष्ट्रिय स्तरको यो प्रतियोगितामा नेपालसहित भारत, फिलिपिन्स र श्रीलंकाको समुदायले सहभागिता जनाएको थियो । नेपालले समूह चरणमा भारतलाई हराउँदै फइनलमा स्थान पक्का गर्दा श्रीलंकाले फिलिपिन्सलाई पराजित गर्दै फाइनलमा स्थान बनाएको थियो ।

दुवई स्पोर्ट्स काउन्सिल र सटल टाइम दुवईले संयुक्त रुपमा आयोजना गरेको प्रतियोगिता १७ देखि १९ जुनसम्म भएको प्रतियोगितामा विभिन्न पाँच विधा समावेश गरिएको थियो । प्रतियोगितामा पुरुष डबल्स, महिला डबल्स, मिक्स डबल्स, मिक्स टि वान र मिक्स टि टु समावेश रहेको थियो ।

पुरुष डबल्समा दिपेश श्रेष्ठ र अनिल जोशी, महिला डबल्समा ज्ञानु बराल र सृष्टि शाक्य, मिक्स डबल्समा टक सुनुवार र पवन मैया नकर्मी रहेका थिए । मिक्स टि वानमा दिपेश श्रेष्ठ, सुनिल पौडेल र सृष्टि शाक्य रहँदा मिक्स टि टुमा टक सुनुवार, ज्ञानु बराल र पवन मैया नकर्मी रहेका थिए ।

पछिल्लो समय युएईमा नेपाली समुदायबीच विशेष गरी ब्याडमिन्टन खेलमा रुचि बढेको छ । एनबीसीको पहलमा समुदायका महिला तथा पुरुषसँगै बालबालिकालाई छुट्टीको दिनमा पायक पर्ने स्थलमा जम्मा भइ खेल्ने गर्दछन् । छोटो समयमा नै नेपाली समुदायले यही स्तरको प्रतियोगिताहरुमा बाक्लो उपस्थिति जनाउन थालेको दुवईबाट टिम व्यवस्थापक हिरालाल श्रेष्ठले जानकारी गराए ।