काठमाडौं (हाम्रो खेलकुद) – अन्तर्राष्ट्रिय टेबल टेनिस खेलाडी अनिता महर्जन नेपालका लागि लण्डनस्थित एरोविक टेबल टेनिसको ब्राण्ड एम्बेसडरमा नियुक्त भएकी छिन् । एरोविकले अनितालाई ३ बर्षका लागि नेपालको आफ्नो एम्बसेडर नियुक्त गरेको बताइएको छ ।

एरोविकले अनितालाई पार्टनर, प्रोमोटर र प्रशिक्षकको रुपमा समेत चयन गरेको छ । लण्डनस्थित एरोविक टेबलटेनिस २०११ मा स्टिभ रोले स्थापना गरेका हुन् । एरोविक टेबलटेनिस खेलाडीहरुलाई एरोविकको माध्ययमबाट शारीरिक तन्दुरुस्त बनाउने कार्यक्रम हो ।

खेलाडीलाई एरोविकका माध्ययमले शारीरिक तन्दुरुस्त बनाउनुका साथै क्यालोरी बर्न गर्ने, मुटु र फोक्सोलाई तन्दुरुस्त राख्ने र टेबलटेनिस खेलको पूर्ण ज्ञान र प्रशिक्षण प्राप्त गर्नेछन् । एरोविक टेबलटेनिस उच्च ईनर्जी फिटनेश वर्कआउट र टेबलटेनिसको सामूहिक गठबन्धन हो ।

जुलाई १५ मा एरोविक टेबल टेनिसका प्रमुख कार्यकारी स्टिभ नेपाल भ्रमणमा आउने र नेपाली खेलाडीहरुलाई प्रशिक्षण प्रदान गर्ने कार्यक्रम रहेको अनिताले जानकारी दिइन् । उनका अनुसार त्यो प्रशिक्षणमा उत्कृष्ट हुने ३ छात्र र ३ छात्रालाई लण्डनस्थित एकेडेमीमा प्रशिक्षणका लागि लैजाने सम्भौता छ ।

साथै एरोविकले खेलाडीका लागि टेबलटेनिसको स्तरिय ब्राण्ड बटरफ्लाई कम्पनीको खेलपोशाक, र्‍याकेट र बल प्रायोजन गर्ने र प्रशिक्षणका लागि आवश्यक रोवोट मेसिन समेत प्रदान गर्ने मा उल्लेख गरेको अनिताले बताइन् ।

अनिताले सामाखुसीस्थित आफ्नै घरमा गत अप्रिलमा टेवल टेनिस डेको अवसर पारेर १५ लाखको लागतमा एन्निज पिङ पङ क्लब स्थापना गरि बच्चाहरुलाई निशुल्क टेबल टेनिस प्रशिक्षण प्रदान गर्दै आईरहेकी छिन् । हाल क्लबमा तीन टेबलटेनिस बोर्ड रहेको छ भने १५ बालबालिकाले प्रशिक्षण लिइरहेका छन् ।

व्यक्तिगत रुपमा महिला उद्यमीको रुपमा उनको कार्यलाई नियाली रहेको अन्तराष्ट्रिय टेबल टेनिस महासंघले उनको कार्यको मुल्याङ्कन गर्दै बिश्व टेबलटेनिस डेको अवसरमा आफ्नो जर्नलमा अनिताको बारेमा लेख समेत प्रकाशित गरेको थियो ।