काठमाडौं (हाम्रो खेलकुद)– नेपाल बुद्धिचाल संघका पूर्व अध्यक्ष राजेशहरी जोशीको निधन भएको छ । ललितपुर पाटन सुन्धारका जोशीको ६३ वर्षको उमेरमा आइतबार साँझ हृदयघातका कारण मृत्य भएको बुद्धिचाल संघका महासचिव हेराकाजी महर्जनले जानकारी दिएका थिए ।

हृदयघात भएपछि बिएण्डबी लैजाने क्रममा उनको मृत्यु भएको हो । आठ वर्ष बुद्धिचाल संघको अध्यक्ष रहेका जोशी एक दशक यता अन्तर्राष्ट्रिय बुद्धिचाल संघको इथिक्स कमिटीको सदस्य रहेका थिए ।

नेपाल बुद्धिचाल संघको दुई कार्यकाल ८ बर्ष अध्यक्षको जिम्मेवारी लिएका जोशीको कार्यकाल नेपालको बुद्धिचाल खेल विकास र विस्तारको लागि महत्त्वपूर्ण कदम चालेका थिए । उनी सन् २०१४ मा नर्वेमा भएको फिडे काँग्रेसबाट विश्व बुद्धिचाल महांघको कार्यसमिति सदस्य र अनुशासन आयोगको सदस्यमा निर्वाचित भएका थिए ।

सन् २०१८ मा जर्जियाको बतुमीमा भएको काँग्रेसबाट दोस्रो कार्यकालको लागि पुनः अनुसाशन आयोगमा निर्वाचित भएका थिए । जोशीको अन्तिम संस्कार मंगलबार गरिने महर्जनलेल जानकारी दिए । जोशीकी श्रीमती, एक छोरी र एक छोरा छन् ।