एजेन्सी – तेस्रो वरियताका राफयल नाडाललाई पराजित गर्दै शीर्ष वरियताका सर्वियन नोभाक जोकोभिचले फ्रेन्च ओपनको फाइनलमा स्थान बनाएको छ ।

पेरिसमा शुक्रबार राति भएको खेलमा जोकोभिचले साविक विजेता नाडाललाई ३–१ को सेटमा पराजित गर्दै लगातार दोस्रो सिजन फाइनलमा स्थान बनाएको हो । ४ घन्टा ११ मिनेट लामोसमयसम्म चलेको सेमिफाइनलमा जोकोभिचले सुरुवाती सेट ३–६ ले गुमाएपनि त्यसपछिको तीनै सेट आफ्नो पक्षमा पार्दै फाइनलमा ग्रीसका स्टेफानोस सिट्टीपाससँगको भेट पक्का गरेको हो ।

दोस्रो सेट जोकोभिचले ६–३ ले आफ्नो पक्षमा पार्दै खेलमा फर्किएका थिए । प्रतिस्पर्धात्मक तेस्रो सेटमा जोकोभिच ७–६ ले विजयी हुदै अग्रता लिदा चौथो सेट ६–२ ले सहजै आफ्नो पक्षमा पार्न सफल भयो । जोकोभिच छैटौंपटक फ्रेन्च ओपनको फाइनलमा पुग्न सफल भएको हो ।

जोकोभिचले २०१६ मा एन्डी मर्रेलाई पराजि गर्दै उपाधि जितेको थियो । जोकोभिच २०१२, २०१४, २०१५, २०१६ र २०२० मा फाइनलमा पुगेको थियो । अब जोकोभिचले उपाधिका लागि ग्रीसका स्टेफानोस सिट्टीपाससँग खेल्नेछ ।

स्टेफानोसले एलेसान्दर जेभेरेभलाई ३–२ को सोझो सेटमा पराजित गर्दै पहिलो पटक फाइनलमा पुग्न सफल भएको छ । स्टेफानोसले सुरुवाती दुई सेट ६–३ र ६–३ ले जितेपनि त्यसपछिको दुई सेट समान ४–६ र ४–६ ले गुमाएको थियो । तर निर्णायक सेटमा स्टोफानोसले ६–३ को सहज जित निकाल्दै फाइनलमा पुग्न सफल भयो ।

कीर्तिमानी १३ पटकको फ्रेन्च ओपन च्याम्पियन नाडाल तेस्रोपटक तथा ६ वर्षपछि फाइनलमा पुग्न असफल भएको हो । नाडाल २००९ मा रोविन सोल्डरलिङसँग तथा २०१५ मा जोकोभिचसँग क्वाटरफाइनलमा पराजित भएको थियो । २०१६ मा चोटका कारण तेस्रो चरणबाट आफ्नो नामा फिर्ता लिएका थिए ।