एजेन्सी – तेस्रो वरियताका स्पेनिस राफयल नाडाल फ्रेन्च ओपन टेनिसको क्वाटरफाइनलमा प्रवेश गरेका छन् । नाडालले १८औं वरियता प्राप्त इटालियन जान्निक सिन्नेरलाई ३–० को सोझो सेटमा पराजित गर्दै अन्तिम आठमा स्थान पक्का गरेको हो ।

पेरिसमा सोमबार राति भएको खेलको पहिलो सेटमा शुरुवातमा २–० को अग्रता लिएपनि नाडाल ४–२ ले पछि परेको थियो । तर नाडालले पहिलो सेट ७–५ ले आफ्नो पक्षमा पार्न सफल भयो । त्यसपछिको दुवै सेटमा नाडालले खासै संघर्ष गर्नुपरेन । दोस्रो सेट ६–३ ले सहजै आफ्नो पक्षमा पारेको नाडालले तेस्रो सेट ६–० ले सहजै आफ्नो पक्षमा पारेको थियो ।

अब ३६ वर्षीय नाडालले क्वाटरफाइनलमा अर्जेन्टिनी डिएगो स्वार्टजमानको सामना गर्नेछ । डिएगोले जर्मनीका जान लेन्नार्ड स्ट्रफलाई ७–६, ६–४ र ७–५ ले पराजित गरेको थियो । नाडाल र डिएगो समग्रमा ११ पटक खेल्दा सबैमा नाडाल विजयी भएको छ । फ्रेन्च ओपनमा उनीहरुको यो तेस्रो भेट हुनेछ । नाडालले २०१८ मा क्वाटरफाइनलमा तथा २०२० मा सेमिफाइनलमा डिएगोलाई पराजित गरेका थियो ।

यस्तै शीर्ष वरियताका सर्वियन नोभाक जोकोभिचले इटालियन लोरेन्जो मुसेट्टीबाट वाकओभर पाएपछि क्वाटरफाइनलम स्थान बनाएको छ । मुसेट्टीले सुरुवाती दुई सेटमा ७–६ र ७–६ को जित निकालेको थियो । त्यसपछिको दुई सेट ६–१ र ६–० ले गुमाएको थियो । निर्णायक सेटमा जोकोभिच ४–० ले अघि रहँदा उनले वाकओभर दिएका थिए ।