काठमाडौं (हाम्रो खेलकुद) – काठमाडौं ब्याडमिन्टन एकेडेमी (केबीए) को आयोजनामा हुने भनिएको कुमारी बैंक काठमाडौं टिम च्याम्पियनसिप २०२१ कर्पोरेट ब्याडमिन्टन (आमन्त्रण) स्थगित भएको छ ।

एकेडेमीका सचिव दिपक थापाले प्रेस विज्ञप्ति जारी गर्दै यही जेठ २०, २१ र २२ गते त्रिपुरेश्वरस्थित राष्ट्रिय खेलकुद परिषद (राखेप) को कभर्डहलमा हुने भनिएको च्याम्पियनसिप स्थगित गरिएको जनाएको छ ।

एकेडेमीले कोरोना भाइरसको महामारीको यो विषम परिस्थितिमा पूर्वनिर्धारित मितिमा प्रतियोगिता आयोजना गर्न संभव नभएको बताएको छ । एकेडेमीले घरेलु ब्याडमिन्टनकै प्रतिष्ठित् प्रतियोगिताको रुपमा हामी कर्पोरेट ब्याडमिन्टनलाई परिस्थिति सहज भएपछि आयोजना गर्ने जानकारी गराएको छ । सरकारले निषेधाज्ञा जारी गरेदेखि नै एकेडेमीको प्रशिक्षणलगायत गतिविधि स्थगित गरिएको बताएको छ ।

ब्याडमिन्टन जगतमा उत्कृष्ट खेलाडीहरू उत्पादन गर्ने उद्देश्यसहित गत पुसमा एकेडेमीको स्थापना भएको थियो । च्याम्पियनसिपलाई कुमारी बैंकले मुख्य प्रायोजकबापत ८ लाख रुपैयाँ पुरस्कारको व्यवस्था गरेको थियो । च्याम्पियनसिपमा पाँच स्पर्धा समावेश गरिएको थियो ।