काठमाडौं (हाम्रो खेलकुद) – नेपालमा खासै विकास हुन नसकेको सेपाकताक्रोले अन्र्तर्राष्ट्रिय प्रतियोगितामा भने सफलता प्राप्त गरेको छ । थाइल्यान्डको बैंककमा भएको ३१ औं किङ्स कप सेपाकताक्रो विश्व च्याम्पियनसिपमा नेपाली टोली दुई पदक जितेर फर्केको छ ।

नेपाल सेपाकताक्रो संघले कार्यक्रम सार्वजनिक गर्ने क्रममा बुधबार पत्रकार सम्मेलनमार्फत संघका अध्यक्ष नेत्रप्रसाद लिम्बूले नेपालले दुई कांस्य पदक जितेको बताएका हुन् । अक्टोबर १७ देखि २३ तारिखसम्म भएको च्याम्पियनसिपमा नेपाली टोलीले रेगु इभेन्ट र डबल इभेन्टमा कांस्य पदक जितेको थियो । अनिल गुरुङको कप्तानीमा रहेको नेपाली टोलीमा अनिल जर्घा मगर, एलन गुरुङ, राजु तामाङ, शैलेश दाहाल, रोशन तामाङ, सुजन डंगोल, मुकुन्द गौतम र रुपेश सुनारले प्रतिस्पर्धा गरेका थिए । गंगा गुरुङ टोलीको प्रशिक्षक हुन् । सोही पत्रकार सम्मेलनमा सेपाकताक्रो संघका संस्थापक अध्यक्ष एवं प्रमुख सल्लाहकार सीताराम मास्के एसियाली सेपाकताक्रो महासंघको उपाध्यक्षमा निर्विचित भएको बताइयो । मास्के अन्तर्राष्ट्रिय सेपाकताक्रो महासंघका पनि सदस्य हुन् । अध्यक्षमा मास्केसहित दक्षिण एसियाली सेपाकताक्रो महासंघमा नेपालबाट पाँच चुनिएको राष्ट्रिय खेलकुद परिषद् (राखेप) ले जनाएको छ । मास्के अध्यक्ष, महासचिवमा ध्रुव गुरुङ, सचिवमा नेत्रप्रसाद गुरुङ तथा सदस्यमा राखेपका सदस्य–सचिव केशवकुमार विष्ट र गंगा गुरुङ चयन भए । जनवरी १३ देखि १५ तारिखसम्म श्रीलंकाको कोलम्बोमा हुने दोश्रो दक्षिण एसियाली सेपाकताक्रो प्रतियोगितामा नेपालले भाग लिने जनाएको छ । दक्षिण एसियाली सेपाककताक्रोको तेस्रो संसकरण आयोजनाका लागि नेपालले दावी गर्ने जनाइएको छ ।