मनाङे गण्डकी प्रदेशको युवा तथा खेलकुद मन्त्री

पोखरा (हाम्रो खेलकुद) – दीपक मनाङेका रुपमा परिचित राजीव गुरुङ गण्डकी प्रदेश सरकारको युवा तथा खेलकुद मन्त्री नियुक्त भएका छन् ।

गण्डकी प्रदेश सरकार जोगाउनका लागि मनाङलाई मन्त्री बनाइएको बताइएको छ । प्रदेश मुख्य मन्त्री पृथ्वी सुब्बा गुरुङले बिहीबार उनलाई मन्त्री नियुक्त गरेका हुन् । बिहीबार नै उनले सपथ लिएका छन् । मनाङे आपराधिक पृष्ठभूमिसहित ज्यान मुद्दाका अभियुक्त हुन्। सांसदमा निर्वाचित हुनुअघि मनाङे जेलमा थिए। मनाङेविरुद्ध ज्यानसम्बन्धी मुद्दा अदालतमा छ।

मनाङे २०७४ सालको मंसिर १० गते सम्पन्न प्रदेश सभा निर्वाचनमा स्वतन्त्र उम्मेदवार थिए । तत्कालीन नेकपा एमालेको समर्थनमा उनले निर्वाचन जितेका थिए । मनाङको प्रदेश (ख) बाट प्रदेश सभामा एक हजार चार सय १० मत ल्याएर स्वतन्त्र उम्मेदवारमा मनाङे विजयी भएका थिए ।

बुधबार गण्डकी प्रदेशसभामा मुख्यमन्त्री पृथ्वीसुब्बा गुरुङ विरुद्धको अविश्वास प्रस्तावमाथि मतदान हुन नसकेपछि मुख्यमन्त्री गुरुङले मन्त्रिपरिषद् विस्तार गरेका हुन् । राष्ट्रिय जनमोर्चाका सांसद खिमविक्रम शाहीको अवस्था बेपत्ता भएको भन्दै बुधबारको प्रदेशसभा बैठक अर्को सूचना प्रकाशित नहुँदासम्मका लागि स्थगित भएको छ ।