काठमाडौं (हाम्रो खेलकुद) – नेपाली राष्ट्रिय क्रिकेट टोलीका ओपनर कुशल भुर्तेलले टि२० आई क्रिकेटमा लगातार तेस्रो अर्धशतक प्रहार गरेका छन् ।

त्रिकोणात्मक टि२० आई सिरिज अन्तर्गत नेपालको नेदरल्यान्ड्सविरुद्ध अर्धशतकका साथ आफ्नो टि२० आई करिअरको लगातार तेस्रो अर्धशतक प्रहार गरेका हुन् । कुशलले ४१ बलमा तेस्रो अर्धशतक प्रहार गरेका हुन् । नेपालबाट टि२० आईमा लगातार तेस्रो अर्धशतक प्रहार गर्ने कुशल एक्लो खेलाडी हुन् । कुशलले १३ औं ओभरको अन्तिम बलमा स्पिनर आर्यन दत्तलाई लङअफमा छक्का साथ अर्धशतक पूरा गरेका थिए ।

टियु क्रिकेट मैदानमा टस जितेर पहिला ब्याटिङ थालेको नेपालले १३ ओभरमा २ विकेट गुमाउँदै १ सय १७ रन बनाएको छ । कुशलले ४१ ब्लमा ६ चौका र १ छक्का प्रहार गरे । उपकप्तान दीपेन्द्रसिंह ऐरीले २३ बलमा ३ चौका र २ छक्का सहित ४० रनमा खेल्दै टोलीलाई ठूलो योगफलको आशा देखाएका छन् । सुरुवाती दुई खेलमा शतकीय साझेदारी ओपनिङ गरेको नेपालले तेस्रो खेलको नेदरल्यान्ड्सविरुद्ध २० रन जोड्दा पहिलो विकेट गुमाउन पुगको । तीव्र गतिका बलर भिभिन किंगमाको बलमा आसिफ मिडअनमा बेन कुपर बाट शून्यमा क्याच आउट भएका थिए ।

दोस्रो विकेटका लागि कप्तान ज्ञानेन्द्र मल्ल र कुशलले ४३ रनको साझेदारी गरेका थिए । कप्तान तथा स्पिनर पिटर सिलारको बलमा ठूलो सट खेलेका ज्ञानेन्द्र डीप मिडविकेटमा बास डी लिडबाट २० रनमा क्याच आउट हुन पुगेका थिए । ज्ञानेन्द्रले १४ बलमा २ चौका र १ छक्का प्रहार गरे ।