काठमाडौं (हाम्रो खेलकुद) – श्री आदर्श कागेश्वरी मनोहरा नगरपालिका नगरस्तरीय राष्ट्रपति रनिङ सिल्ड खेलकुद प्रतियोगितामा च्याम्पियन बनेको छ ।

कागेश्वरी मनोहरा नगर खेलकुद विकास समितिद्वारा आयोजित प्रतियोगिता ६ स्वर्ण, २ रजत र १ कांस्य जित्दै २१ अंकसाथ श्री आदर्श शुक्रबार समग्रमा च्याम्पियन बनेको हो । २ स्वर्ण, ५ रजत र ३ कांस्यसाथ १९ अंक जोडेको हिन्दु विद्यापीठ दोस्रो स्थान हासिल ग¥यो । क्रिस्टियन कम्युनिटी स्कुल (सीसीएस) र तेज विनायक समान १७ अंकसाथ संयुक्त रुपमा तेस्रो हुन सफल भए ।

प्रतियोगिताको अन्तिम दिन शुक्रबार तेक्वान्दो र एथलेटिक्सका खेलहरु भएको थियो । दुवै खेलमा आ–आफ्नो स्पर्धामा शीर्ष तीन स्थान हात पार्ने खेलाडीले क्रमशः २ हजार, १ हजार र ५ सय नगद पुरस्कार प्राप्त गरे ।

विजेतालाई कागेश्वरी मनोहरा नगरपालिकाका मेयर कृष्णहरि थापा, आयोजक नगर समितीका अध्यक्ष रामप्रसाद पुडासैनी, समाजसेवी अमरचन्द्र बोहरा, नेपाल एथलेटिक्स संघका सचिव आरके विष्ट, कागेश्वरी नगरपालिकाअन्तर्गत शिक्षा तथा खेलकुद शाखाका प्रमुख गोविन्दप्रसाद शर्मा प्रतियोगिता संयोजक अशोक खड्कालगायतले एक कार्यक्रमबीच पुरस्कृत गरे ।

एथलेटिक्समा विभिन्न १९ विद्यालयका २ सय ११ खेलाडीले १२ स्पर्धामा प्रतिस्पर्धा गरेका थिए । प्रतियोगिता काठमाडौं जिल्लास्तरीय राष्ट्रपति रनिङ सिल्डका लागि खेलाडी छनोटका रुपमा समेत रहेको छ ।