काठमाडौं (हाम्रो खेलकुद) – सुकदेव कार्की र ज्योति थापा रुप कार्की स्मृति प्रथम नेपाल्स स्ट्रोङगेष्ट राष्ट्रव्यापी पावर लिफ्टिङ प्रतियोगितामा ओभरअल विजेता बनेका छन् । सुकदेव पुरुष तथा ज्योति महिलातर्फ च्याम्पियन बनेका हुन् ।

नेपाल पावर लिफ्टिङ संघद्वारा आयोजित प्रतियोगितामा सुकदेव र ज्योतिले आ–आफ्नो स्पर्धामा स्वर्ण जित्न सफल भएका थिए । सुकदेवले ५९.१–६६ केजी तथा ज्योतिले ६० केजीमुनि तौलसमूहमा स्वर्ण जितेका थिए । दुवैले ओभरअल विजेता बनेवापत ५१ हजार नगद पुरस्कार हात पारे । स्पर्धामा पहिलो भएवापत दुवैलाई छुट्टै जनही १० हजार रुपैयाँ प्राप्त गरे ।

त्रिपुरेश्वरस्थित राष्ट्रिय खेलकुद परिषद्को कभर्डहलमा भएको प्रतियोगिताको पुरुष ५९ केजीमुनि हर्क राई, ६६.१–७४ केजीमा रविन राई, ७४.१–८३ केजीमा ओजशचरण जोशी, ८३.१ देखि ९३ केजीमा आदित्य चौधरी र ९३ केजीमाथि डा. मोहित कार्की पहिलो भए । महिला ६० केजीमाथि सुजिता मानन्धरले शीर्ष स्थान हात पारिन् । पुरुष भेट्रानको ४०–५० वर्षमा टेकेन्द्र गुरुङ तथा ५० वर्षमाथि राजकुमार घजु पहिलो बने ।

१० स्पर्धामा समावेश प्रतियोगिताको हरेक स्पर्धामा पहिलो हुनेलाई १० हजार, दोश्रोलाई ५ हजार र तेश्रोलाई ३ हजार नगद पुरस्कार प्रदान गरिएको आयोजक समितिका सचिव सुरेश सुवेदीले जनाएका छन् । एकदिने प्रतियोगितामा ७३ पुरुष र २८ महिला गरी १ सय १ खेलाडी सहभागी थिए ।

अमेरिकामा बस्दै आएका पावर लिफ्टिङका मास्टर्सतर्फका दुई पटकका विश्व च्याम्पियन स्व. रुप कार्कीको स्मृतिमा प्रतियोगिता आयोजना गरिएको हो । नेपालमै रहेका बेला केहि महिनाअघि उनको हृदयघाटका कारण निधन भएको थियो ।