काठमाडौं (हाम्रो खेलकुद) – पहिलो नेपाली महिला सगरमाथा आरोही राष्ट्रिय विभुति पासाङ ल्हामु शेर्पाको स्मृतिमा उनकै जन्मस्थान सोलुखुम्बुमा प्रथम पासाङ ल्हामु स्मृति कप गाउँ स्तरीय पुरुष र जिल्ला स्तरीय खुल्ला महिला भलिबल प्रतियोगिता बैशाख दोस्रो साता आयोजना हुने भएको छ ।

आयोजकले राजधानीमा पत्रकार सम्मेलन गर्दै प्रतियोगिता सगरमाथाको फेदि खुम्बु पासाङ ल्हामु गाउँपालिका सुर्केमा ८, ९ र १० बैशाखमा हुने जानकारी गराएको हो । राष्ट्रिय विभुति पासाङ ल्हामु शेर्पाले सगरमाथामा पहिलोपटक पाइला टेकेको दिन १० बैशाखमा फाइनल खेल हुनेछ ।

आयोजक कमिटिका संयोजक जाङ्बु शेर्पाले महिलालाई प्राथमिकतामा राखेर प्रतियोगिता आयोजना गरिएको बताए । नेपाल भलिबल संघका अध्यक्ष मनोरन्जन रमण शर्माले प्रतियोगितालाई सफलताको शुभकामना दिदै यस प्रतियोगितालाइ संघका वार्षिक क्यालेन्डरमा राख्ने विषयमा छलफल गरिने बताएका छन् । यस्तै आयोजकले प्रतियोगितालाई निरन्तरता दिने बताएका छन् ।

प्रतियोगितामा पुरुषतर्फ १५ देखि १६ र महिलामा ६ भन्दा बढी टोलीको सहभागिता हुन सक्ने आयोजकले जनाएको छ । खेलहरु लिग कम नकआउटका आधारमा हुनेछ । सेमिफाइनलदेखि बेस्ट अफ फाइभमा हुनेछ ।

प्रतियोगिताको विजेताले १ लाख, उपविजेताले ५० हजार र तेस्रो हुने टिमले २५ हजार रुपैयाँ प्राप्त गर्नेछ । विधागत तर्फका उत्कृष्ट खेलाडी, सेटर र स्पाइकरलाई पुरस्कृत गरिने आयोजकले जनाएको छ । प्रतियोगिताको लागि करिव १५ लाख खर्च हुने आयोजकले अनुमान गरेको छ ।