काठमाडौं (हाम्रो खेलकुद) – हिम रश्मी हाई स्कुलका दिल बहादुर सुनार र राजेन्द्र विष्टको जोडीले बाग्लुङ कप खुल्ला राष्ट्रिय पुरुष २ ‘ए’ साइड भलिबल प्रतियोगिताको उपाधि जितेको छ ।

ह्याप्पी योङ युथ क्लब बाग्लुङको आयोजनामा काठमाडौं नयाँ बसपार्कस्थित ढोरपाटन स्पोर्ट्स क्लबको खेल मैदानमा आइतबार भएको फाइनलमा दिल र राजेन्द्रको जोडीले छन्त्याल समाजका विकास छन्त्याल र नरेश छन्त्यालको जोडीलाई ३–१ को सेटमा पराजित गर्दै उपाधि जितेको हो ।

दिल र राजेन्द्रको जोडीले पहिलो सेट २१–१५ ले आफ्नो पक्षमा पारेको थियो । दोस्रो सेटमा २१–१८ को जित निकालेको दिल र राजेन्द्रको जोडीले तेस्रो सेट ११–२१ ले गुमाएको थियो । चौथो सेटमा २१–१४ को जित निकाल्दै उपाधि जित्न सफल भएको हो ।

पोखराका चित्र छन्त्याल र युवराज छन्त्यालको जोडीले साराङ्गे गेस्ट हाउसका अमृत केसी र सौरभ गुरुङको जोडीलाई .२–१ को सेटमा पराजित गर्द तेस्रो स्थान हासिल गर्‍यो ।

उपाधिसँगै दिल र राजेन्द्रको जोडीले ६० हजार रुपैयाँ प्राप्त गरेको छ । दोस्रो भएको विकास छन्त्याल र नरेश छन्तयालको जोडीले ३० हजार रुपैयाँ प्राप्त गरेको छ । तेस्रो भएको चित्र छन्त्याल र युवराज छन्त्यालको जोडीले १५ हजार प्राप्त गर्‍यो ।

विजयी टोली तथा खेलाडीलाई समाजसेवी अर्जुन शेरचन, ढोरपाटन क्लबका वरिष्ठ उपाध्यक्ष किरण घायल, हिमरश्मी स्कुलका प्रिन्सिपल तथा विद्यालय भलिबल कमिसनका महासचिव लोकेन्द्र खड्कालगायतले पुरस्कृत गरे ।

हिम रश्मीका राजेन्द्र विष्ट प्रतियोगिताको सर्वाेत्कृष्ट खेलाडी चुनिए । उनले ट्रफीसहित २ हजार रुपैया हात पारेको छ । २७ चैतबाट शुरु भएको प्रतियोगितामा १५ टोलीको सहभागिता रहेको थियो । सहभागी चार समुहमा विभाजन गरिएको छ ।