काठमाडौं (हाम्रो खेलकुद) – हिम रश्मी हाई स्कुलका दिल बहादुर सुनारको जोडी बाग्लुङ कप खुल्ला राष्ट्रिय पुरुष २ ‘ए’ साइड भलिबल प्रतियोगिताको सेमिफाइनलमा प्रवेश गरेको छ ।

ह्याप्पी योङ युथ क्लब बाग्लुङको आयोजनामा काठमाडौं नयाँ बसपार्कस्थित ढोरपाटन स्पोर्ट्स क्लबको खेल मैदानमा शनिबार भएको क्वाटरफाइनलमा दिलको जोडीले आरसिबीका विजय थापा र टेकराज अवस्थीको जोडीलाई २–१ को सेटमा पराजित गर्दै अन्तिम चारको यात्रा तय गर्न सफल भएका हुन् । पहिलो सेट १०–२१ ले गुमाएको दिलको जोडीले त्यसपछिको दुवै सेट २१–११ र २१–१५ ले आफ्नो पक्षमा पारेको थियो ।

यस्तै अर्काे खेलमा साराङ्गे गेस्ट हाउसका अमृत केसी र सौरभ गुरुङको जोडीले लक्ष्मण राना र बलीराम चौधरीको जोडीलाई २२–२० र २१–१७ ले पराजित गर्दै अन्तिम चारमा स्थान बनाए ।

यस्तै अर्काे क्वाटरफाइनलमा लोकेन्द्र छन्त्याल र विकास छन्त्यालको जोडीले मनविर छन्तयालको जोडीलाई २१–१८ र २२–२० ले पराजित गर्दै सेमिफाइनलमा स्थान बनाए । यस्तै बिकास छन्त्याल र नरेश छन्तयालको जोडीले पनि अन्तिम चारमा स्थान पक्का गरे । सेमिफाइनल र फाइनल आइतबार हुनेछ ।

प्रतियोगितामा १५ टोलीको सहभागिता रहेको छ । सहभागी चार समुहमा विभाजन गरिएको छ । हरेक समूहका शीर्ष दुई टोलीले क्वाटरफाइनलमा स्थान बनाउनेछन् । प्रतियोगिताको विजेताले ६० हजार रुपैयाँ हात पार्नेछन् । दोस्रो हुनेले ३० हजार तथा तेस्रो हुने टोलीले १५ हजार रुपैयाँ हात पार्नेछन् ।