काठमाडौं (हाम्रो खेलकुद) – कस्तुरी कलेजकी सिमा राजबंशी प्रदेश १ स्तरिय मेयर कप ब्याडमिन्टन प्रतियोगितामा महिला एकलतर्फ अन्तिम चारमा प्रवेश गर्न सफल भएकी छिन् ।

विश्व जुनियर बरियतामा ४२औं स्थानमा रहेकी सिमाले शनिबार सम्पन्न प्रि–क्वाटरफाइनलमा पकलीकी नविना राईलाई २१–८ र २१–७ को सोझो सेटमा पराजित गर्दै क्वाटरफाइनलमा स्थान पक्का गर्दा क्वाटरफाइनलमा काकरभित्ताकी अञ्जना राई र बिराटनगरकी भावना गुरुङबीचको विजेतासँग खेल्नुपर्नेमा दुवै अनुपस्थित भएपछि सिमाले सिधै सेमिफाइनलमा स्थान बनाएकी हुन् ।

धनकुटाकी गिता राई, बेलटार ब्याडमिन्टन एकेडेमीकी रोजी राई, सुनसरीकी सृष्टी राई, धनकुटाकी अरुणा तामाङ, सुनसरी ब्याडमिन्टन एकेडेमीकी आरजु सिग्देल र बिराटनगरकी रोज पाण्डेले क्वाटरफाइनलमा स्थान बनाएकी छन् ।

प्रतियोगिताको महिला एकल तर्फ १६, पुरुष युगलतर्फ २१, आन्तरिक युगलतर्फ ५२ र भेट्रान्स तर्फ २१ जोडीले सहभागिता जनाएका छन् । पुरुष युगलतर्फको शीर्ष तीन बिजेताले ३० हजार, २० हजार र १० हजार रुपैयाँ प्राप्त गर्नेछन् ।

यस्तै महिला एकलतर्फको शीर्ष तीन विजेताले १० हजार, ७ हजार र ३ हजार, भेट्रान्स तर्फको शिर्ष तीनले १५ हजार, १० हजार र ७ हजार तथा आन्तरिक विचका शिर्ष तीनले १५ हजार, १० हजार र ५ हजार रुपैयाँ प्राप्त गर्नेछन् ।