काठमाडौं (हाम्रो खेलकुद) – ह्याप्पी योङ युथ क्लब बाग्लुङको आयोजनामा काठमाडौं नयाँ बसपार्कमा बाग्लुङ कप खुल्ला राष्ट्रिय पुरुष २ ‘ए’ साइड भलिबल प्रतियोगिता शुरु भएको छ ।

नयाँ बसपार्कस्थित ढोरपाटन स्पोर्ट्स क्लबको खेल मैदानमा शुक्रबार भएको खेलमा आरसीबीबाट प्रतिनिधित्व गरेका विजय थापा र टेकराज अवस्थीको जोडीले विजयी शुरुवात गरेका छन् । विजय र टंकको जोडीले म्याग्दीको जोडीलाई समान २१–१९ र २१–१९ को सोझो सेटमा हराए । सन्जुविक्रम शाह र महेन्द्र छन्त्यालको जोडी पोखराको जोडीसँग १९–२१ र २०–२२ को सोझो सेटमा पराजित हुन पुगे ।

यस्तै नेपाल भलिबल संघका सचिव तथा ढोरपाटन क्लबका अध्यक्ष मनविर छन्त्यालको जोडीले अमृत केसीको जोडीलाई २१–१९ र २१–१७ ले पराजित गर्दै विजयी शुरुवात गरेका छन् ।

आइतबारसम्म सञ्चालन हुने प्रतियोगितामा १५ टोलीको सहभागिता रहेको छ । सहभागी चार समुहमा विभाजन गरिएको छ । हरेक समूहका शीर्ष दुई टोलीले क्वाटरफाइनलमा स्थान बनाउनेछन् । प्रतियोगिताको विजेताले ६० हजार रुपैयाँ हात पार्नेछन् । दोस्रो हुनेले ३० हजार तथा तेस्रो हुने टोलीले १५ हजार रुपैयाँ हात पार्नेछन् ।

त्यसअघि प्रतियोगिताको प्रमुख अतिथि युएसए कलाकार संघका कोषाध्यक्ष, प्रोफेसनल डिजे तथा युनाइटेड शेर्पा क्युडगका भलिबल संयोजक जाङ्वु शेर्पाले उद्घाटन गरेका थिए । उद्घाटन कार्यक्रममा ढोरपाटन क्लबका उपाध्यक्ष किरण घायल, असिम युथ क्लबका लोक बिक्रम मल्ल, विद्यालय भलिबल कमिसनका उपाध्यक्ष लोकेन्द्र खड्कासँगै प्रतियोगिता संयोजक दिल बहादुर सुनारको उपस्थिति रहेको थियो ।