काठमाडौं (हाम्रो खेलकुद) – नेपाली राष्ट्रिय पुरुष भलिबल टोली तथा विभागीय त्रिभुवन आर्मी क्लबका मिडल ब्लकर हरि अधिकारी कम्तीमा पनि दुई महिना कोर्ट बाहिर रहने भएका छन् ।

पाँचौ संस्करणको आरबीबी एनभिए कप राष्ट्रिय महिला तथा पुरुष क्लब लिग भलिबलको लिग चरणको अन्तिम खेलमा विभागीय टोली नेपाल पुलिससँगको खेल दौरान उनी घाइते भएका थिए । ब्लक गर्ने क्रममा ल्यान्डिङ नमिल्दा उनले बायाँ खुट्टाको एंकलमा चोट लागेको थियो ।

पहिलो सेटको खेलमा ४–४ को बराबरीमा को अवस्थामा ब्लक गर्दा पुलिसका खेलाडीसँग ठोक्किदा र ल्यान्डिङ नमिल्दा उनले चोट बोकेका थिए । लगत्तै उनलाई सामान्य उपचारपछि नोवेल अस्पतालमा लगिएको थियो ।

त्यहाँ उनको एक्सरे र एमआरआई रिपोर्ट हेर्दा उनले कम्तीमा पनि दुई महिना विश्राम लिनुपर्ने भएको हो । डाक्टर रन्जित शाहका अनुसार उनको चोट पुर्ण रुपमा ठीक हुन कम्तीमा पनि दुई महिना लाग्नेछन् । उनको उपचार डाक्टर शाह नेतृत्वको टोलीले गर्नेछन् ।

हरिको अनुपस्थितिमा आर्मीले सुरुवाती दुई सेट जितेपनि पछिल्लो ३ सेट गुमाउँदै लिगबाट बाहिरिएको थियो । उक्त खेलमा आर्मी सोझो सेटमा विजयी भएको भए फाइनलमा स्थान बनाउने थियो । उक्त खेलमा हरिको अभाव खड्किएको थियो ।

नेपाल भलिबल संघले लिग अवधिभर खेलाडी र अफिसियलको विमा गरिने जनाएको थियो । अब संघले नै उनको उपचार खर्च विमा रकमबाट उपलब्ध गराउने छ ।

हरिले २०७३ मा माल्दिभ्समा भएको तेस्रो एभिसी एसियन सेन्ट्रल जोन सिनियर पुरुष भलिबल च्याम्पियनसिपपछि राष्ट्रिय टोलीमा स्थान बनाएका थिए । सोही च्याम्पियनसिपमा नेपालले ऐतिहासिक कास्यपदक जितेको थियो ।

त्यसपछि उनी लगातार राष्ट्रिय टोलीमा रहँदै आएका छन् । उनले राष्ट्रिय टोलीबाट एसियन गेम्स, साग गेम्स, सेन्ट्रल जोनसँगै हङकङ, मकाउ, डेनमार्क, बंगलादेश र अफगानिस्तानविरुद्धको मैत्रीपुर्ण खेल खेलेका छन् ।