काठमाडौं (हाम्रो खेलकुद) – होङ्गान्जी न्यु डायमन्ड स्पोर्ट्स क्लब पाँचौ संस्करणको आरबीबी एनभिए कप राष्ट्रिय महिला तथा पुरुष क्लब लिग भलिबलको महिलातर्फको च्याम्पियन बनेको छ ।

त्रिपुरेश्वरस्थित राष्ट्रिय खेलकुद परिषद (राखेप) को कभर्डहलमा बिहीबार भएको फाइनलमा नेपाल पुलिस क्लबलाई ३–२ को सेटमा पराजित गर्दै च्याम्पियन बनेको हो । यससँगै न्यु डायमन्ड वर्षको पहिलो २०७४ माघपछि पहिलो उपाधि जित्न सफल भएको छ ।

न्यु डायमन्ड २०७४ माघमा आफैले आयोजना गरेको प्रथम न्यु डायमन्ड कपको च्याम्पियन बनेयता दर्जन बढीपटक फाइनलमा पुगेपनि उपाधि जित्न सकेको थिएन । यस्तै डायमन्ड तेस्रो संस्करणपछि एनभिए लिगको च्याम्पियन बनेको हो । तेस्रो संस्करणमा डायमन्डले नेपाल पुलिसलाई पराजित गर्दै उपाधि जितेको थियो । डायमन्ड पहिलो संस्करणको पनि च्याम्पियन हो ।

बिहीबार डायमन्डले पहिलो सेट २२–२५ ले गुमाएको थियो । पहिलो सेटको सुरुवातमा ५–० ले पछि पर्दै खराव सुरुवात गरेपनि प्रतिस्पर्धात्मक पूनरागमन गरेको डायमन्डले उक्त सेट आफ्नो पक्षमा पार्न सकेन । तर, पहिलो सेटको अन्तिमको लयलाई त्यसपछि कायम राख्दै विभागीय टोलीमाथि जित हासिल गर्न सफल भयो ।

दोस्रो सेटमा सुरुवात देखि नै अग्रतामा रहेको डायमन्डले पछि फर्केर हेर्नु परेन । उक्त सेटमा डायमन्ड २५–११ ले विजयी भएको थियो । तेस्रो सेट डायमन्डले २५–१९ को सहज जित निकाल्दै उपाधि नजिक पुगेको थियो ।

प्रतिस्पर्धात्मक चौथो सेट डायमन्डले २१-२५ ले गुमाएको थियो । सुरुवातदेखि नै पछि परेको डायमन्डले पुनरागमन प्रयास गरेपनि सफल हुन सकेन । प्रतिस्पर्धात्मक पाँचौ तथा निर्णायक सेटमा डायमन्ड १५-११ ले विजयी हुँदै च्याम्पियन बन्न सफल भएको छ ।

उपाधिसँगै न्यु डायमन्डले ३ लाख रुपैयाँ हात पारेको छ । दोस्रो भएको पुलिसले १ लाख ७५ हजार, तेस्रो भएको एपिएफले ७५ हजार तथा चौथो भएको आर्मीले ३७ हजार ५ सय रुपैयाँ प्राप्त गरेको छ । १९ चैतबाट शुरु भएको प्रतियोगितामा पुरुषतर्फ ७ र महिलातर्फ ६ टोलीले प्रतिस्पर्धा गरेका थिए । प्रतियोगिताको सर्वोत्कृष्ट पुरुष र महिला खेलाडीले समान २५–२५ हजार प्राप्त गर्नेछन् । व्यक्तिगत विधाका उत्कृष्ट लिवेरो, स्पाइकर, ब्लकर, सर्भर, सेटर र प्रशिक्षकले जनही १०–१० हजार हात पार्नेछन् ।

यस्तै पुरुषतर्फ टिप टप हेल्प नेपाल स्पोर्ट्स विभागीय नेपाल एपिएफ क्लबलाई ३–० को सोझो सेटमा पराजित गर्दै च्याम्पियन बनेको छ ।
एकपक्षीय बनेको खेलमा तीन भारतीय खेलाडी सम्मिलित हेल्प नेपालले पहिलो सेट २५–१४ ले सहजै आफ्नो पक्षमा पारेको थियो । दोस्रो सेटमा २५–२० को सहज जित निकालेको हेल्प नेपालले तेस्रो सेटमा २५–२२ को जित निकाल्दै च्याम्पियन बन्न सफल भयो ।

उपाधिसँगै हेल्प नेपालले ३ लाख रुपैयाँ हात पारेको छ । दोस्रो भएको एपिएफले १ लाख ७५ हजार, तेस्रो भएको बुलबुले रारा भलिबल क्लबले ७५ हजार तथा चौथो भएको नेपाल पुलिस क्लबले ३७ हजार ५ सय रुपैयाँ प्राप्त गरेको छ ।