काठमाडौं (हाम्रो खेलकुद) – विभागीय नेपाल पुलिस क्लबलाई सोझो सेटमा पराजित गर्दै होङ्गान्जी न्यु डायमन्ड स्पोर्ट्स क्लब राजधानीमा जारी पाँचौ संस्करणको आरबीबी एनभिए कप राष्ट्रिय महिला तथा पुरुष क्लब लिग भलिबल च्याम्पियनसिपको महिलातर्फ शीर्षस्थानमा उक्लदै फाइनल पुग्ने सम्भावना जीवित बनाएको छ ।

त्रिपुरेश्वरस्थित राष्ट्रिय खेलकुद परिषद (राखेप) को कभर्डहलमा मंगलबार भएको खेलमा डायमन्डले पुलिसमाथि ३–० कोसोझो सेटमा जित निकालेको हो । एकपक्षीय खेलमा डायमन्डले पहिलो सेटमा २५–२२ ले जितेको दोस्रो सेटमा पनि २५–२२ को जित निकालेको डायमन्डले तेस्रो सेटमा २५–१६ को जितमा निकाल्यो ।

जितपछि डायमन्डको ५ खेलबाट १० अंक पुगेको छ । दोस्रो स्थानमा रहेको एपिएफको पनि १० अंक नै छ । आर्मी र पुलिसको समान ८ अंक छ । भरतपुर महानगर खेलकुद परिषद र ढोरपाटन स्पोर्ट्स क्लब लिग चरणबाट बाहिरिएको छ । यस्तै मंगलबारै भएको अर्काे खेलमा नेपाल एपिएफ क्लबले भरतपुर महानगर खेलकुद परिषदलाई २५–१३, २५–७ र २५–९ को सोझो सेटमा पराजित गर्दै फाइनल पुग्ने सम्भावना जीवित बनाएको छ ।

अब बुधबार हुने लिग चरणको अन्तिम खेलमा आर्मी र पुलिस तथा डायमन्ड र एपिएफबीच प्रतिस्पर्धा हुनेछ । प्रतियोगितामा पुरुषतर्फ ७ तथा महिलातर्फ ६ टोलीको सहभागिता छ । लिगपछि शीर्ष दुई टोलीले उपाधिका लागि प्रतिस्पर्धा गर्नेछ । लिगमा मंगलबार महिलातर्फ एपिएफ र भरतपुर तथा न्य डायमन्ड र पुलिसबीच प्रतिस्पर्धा हुनेछ । पुरुषतर्फ एपिएफ र पुलिस, हेल्प नेपाल र आर्मी तथा बुलबुले र मणिमुकुन्दबीच प्रतिस्पर्धा हुनेछ ।

लिग अवधिभर खेलाडी र अफिसियलको बिमा गरिने संघले जनाएको छ । प्रतियोगिताको पुरुष र महिला दुवैतर्फको विजेताले ३ लाख रुपैयाँ हात पार्नेछन् । दोस्रो हुनेले १ लाख ७५ हजार, तेस्रोले ७५ हजार तथा चौथो हुने टोलीले ३७ हजार ५ सय प्राप्त गर्नेछन् । प्रतियोगिताको सर्वोत्कृष्ट पुरुष र महिला खेलाडीले समान २५–२५ हजार प्राप्त गर्नेछन् । व्यक्तिगत विधाका उत्कृष्ट लिवेरो, स्पाइकर, ब्लकर, सर्भर, सेटर र प्रशिक्षकले जनही १०–१० हजार हात पार्नेछन् ।