काठमाडौं (हाम्रो खेलकुद) – मणि मुकुन्द भलिबल क्लबले राजधानीमा जारी पाँचौ संस्करणको आरबीबी एनभिए कप राष्ट्रिय महिला तथा पुरुष क्लब लिग भलिबल च्याम्पियनसिपको पुरुषतर्फ रोमाञ्चक जित निकालेको छ ।

लिगमा पहिलो जित दर्ता गर्ने क्रममा मणि मुकुन्दले नयाँ बजार सामाजिक युवा क्लबलाई ३–२ को सेटमा पराजित गरेको हो । शुरुवाती दुई सेट जितेको मणि मुकुन्दले त्यसपछिको दुई सेट गुमाउँदा निर्णायक सेटमा मणि मुकुन्द विजयी हुन सफल भएको थियो ।

त्रिपुरेश्वरस्थित राष्ट्रिय खेलकुद परिषद (राखेप) को कभर्डहलमा सोमबार भएको खेलमा मणि मुकुन्दले पहिलो र दोस्रो सेट क्रमश २५–२१ र २५–१५ ले सहजै आफ्नो पक्षमा पारेको थियो । प्रतिस्पर्धात्मक तेस्रो सेटमा २४–२५ ले गुमाएको मणि मुकुन्दले चौथो सेट २२–२५ ले गुमाएको थियो । तर, निर्णायक तथा पाँचौ सेटमा सुदृढ खेल पस्केको मणि मुकुन्दले १५–१० ले आफ्नो पक्षमा पार्दै लिगमा पहिलो जित दर्ता गर्न सफल भयो ।

यो जितपछि मणि मुकुन्दको ५ खेलबाट २ अंक जोडेको छ । पराजित नयाँबजारले पनि ५ खेलबाट १ अंक जोडेको छ । शीर्षस्थानमा रहेको अपराजित टिप टप हेल्प नेपालको १२ अंक छ । आर्मी र एपिएफको समान ९ अंक छ । बुलबुले रारा र पुलिसको समान ६ अंक छ ।

२६ चैतसम्म हुने प्रतियोगितामा पुरुषतर्फ ७ तथा महिलातर्फ ६ टोलीको सहभागिता छ । लिगपछि शीर्ष दुई टोलीले उपाधिका लागि प्रतिस्पर्धा गर्नेछ । लिगमा मंगलबार महिलातर्फ एपिएफ र भरतपुर तथा न्य डायमन्ड र पुलिसबीच प्रतिस्पर्धा हुनेछ । पुरुषतर्फ एपिएफ र पुलिस, हेल्प नेपाल र आर्मी तथा बुलबुले र मणिमुकुन्दबीच प्रतिस्पर्धा हुनेछ ।

लिग अवधिभर खेलाडी र अफिसियलको बिमा गरिने संघले जनाएको छ । प्रतियोगिताको पुरुष र महिला दुवैतर्फको विजेताले ३ लाख रुपैयाँ हात पार्नेछन् । दोस्रो हुनेले १ लाख ७५ हजार, तेस्रोले ७५ हजार तथा चौथो हुने टोलीले ३७ हजार ५ सय प्राप्त गर्नेछन् । प्रतियोगिताको सर्वोत्कृष्ट पुरुष र महिला खेलाडीले समान २५–२५ हजार प्राप्त गर्नेछन् । व्यक्तिगत विधाका उत्कृष्ट लिवेरो, स्पाइकर, ब्लकर, सर्भर, सेटर र प्रशिक्षकले जनही १०–१० हजार हात पार्नेछन् ।